އަޙްމަދު ރަޝީދު ވ. މޯލްޑިވްސް ކަސްޓަމްސް ސަރވިސް

ޓްރައިބިއުނަލުން ވަކިކުރުމަށް އެކަށީގެންވާ ސަބަބު އޮތް ނަމަވެސް އިޖުރާއީ ޢަދުލުވެރިކަން ޤާއިމުނުކުރާތީ ވަޒީފާއާބެހޭ ޤާނޫނުގެ 87 ވަނަ މާއްދާގެ (ށ) ގެ ދަށުން 47,760 ރުފިޔާ ބަދަލު ދިނުމަށް ނިންމިއެވެ. ނަމަވެސް ނިންމި ދުވަހު ދޫކުރި ރިޕޯޓުގެ 11 ވަނަ ނުކުތާގައި ވަކިކުރުމަކީ 'އަންފެއަރ ޑިސްމިސަލް' ކަމަށް ބުނެފައިވާއިރު، ފަހުން ފޮނުވި ރިޕޯޓުގައި އެ ބައި ބަދަލުވެފައިވެއެވެ.

ކަސްޓަމްސް އޮފިސަރެއްގެ މަޤާމުގައި ހުރި މުވައްޒަފަކު، ތުހުމަތެއް ބަލަމުންދާތީ 30 ދުވަހަށް އޮފީހަށް ނިކުތުން މަނާކޮށް، ފަހުން ވަޒީފާއިން ވަކިކޮށްފައިވެއެވެ. އޭނާ ވަޒީފާ އިޢާދަކޮށްދިނުމާއި، މަޤާމުގެ ކުރިއެރުމާއި ބަދަލަށް ޓްރައިބިއުނަލަށް މައްސަލަ ހުށަހެޅިއެވެ.

އިސްތިއުނާފުކުރި ފަރާތުން ބުނީ މައުޟޫޢީ ޢަދުލުވެރިކަން ޤާއިމުވާކަމަށް ނިންމީ ޤާނޫނާ ޚިލާފަށް ކަމަށާއި، ސަސްޕެންޝަން ޤާނޫނާ ޚިލާފު ކަމަށާއި، މަޤާމުގެ ކުރިއެރުމާ ބެހޭ ހެކިތަކަށް ރިޢާޔަތް ނުކުރާ ކަމަށާއި، އެއް ކުށަކަށް ދެފަހަރު އަދަބު ދީފައިވާ ކަމަށެވެ.

ވަޒީފާއާބެހޭ ޓްރައިބިއުނަލުން މައްސަލަ ނިންމި ދުވަހު ޚަޞްމުންނަށް ދޫކުރި ޚުލާޞާ ރިޕޯޓާއި، އޭގެ ފަހުން 'ޑްރާފްޓް ކޮޕީއެއް' ކަމަށް ބުނެ ފޮނުވި ރިޕޯޓުގެ ނިންމުމުގައި ތަފާތުތައް ހުރުމުން، ނިންމުން އިއްވުމަށްފަހު ނިންމުމަށް ބަދަލު ގެނެސްފައިވާތީ އެ ނިންމުން ބާޠިލުކުރަންޖެހޭތޯ.

ޓްރައިބިއުނަލްގެ ނިންމުން ބާޠިލު، އަލުން ބެލުމަށް ފޮނުވި

ނިންމުން އިއްވުމަށްފަހު ރިޕޯޓުގެ ނިންމުމަށް ބޮޑު ބަދަލުތަކެއް ގެނެސްފައިވާތީ އަދި ފަހުގެ ރިޕޯޓުގެ ތަޙުލީލާއި ނިންމުން ދިމާނުވާތީ، ޞައްޙަ ނިންމުމަކީ ކޮބައިކަން ނޭނގޭތީ އިސްތިއުނާފުގެ ނުކުތާތަކަށް ބަލައި ގޮތެއް ނުކަނޑައެޅޭނެ ކަމަށް ކޯޓުން ނިންމިއެވެ.