އަޙްމަދު ލަބީބް ވ. މުޙައްމަދު ނަޘީމް ޢަލީ

ސިވިލް ކޯޓުން 234,000 ރުފިޔާ 30 ދުވަހުގެ ތެރޭގައި ދެއްކުމަށް އަންގައި، ދެ އެއްބަސްވުމަކީ ބާޠިލު އެއްބަސްވުން ކަމަށް ކަނޑައަޅައި ދަޢުވާލިބޭ ފަރާތުގެ ޣައިރު ޙާޟިރުގައި ޙުކުމްކުރިއެވެ.

އިސްތިއުނާފުކުރި ފަރާތުން އިސްތިއުނާފު ރައްދުވާ ފަރާތަށް ގޭގެ 2 އަދި 3 ވަނަ ފަންގިފިލާ ދެ އެއްބަސްވުމެއްގެ ދަށުން ކުއްޔަށްދީފައި ވާއިރު، ކުލި ނުދައްކާތީ އެއްބަސްވުން ބާޠިލްކޮށް ތަންތަން ޙަވާލުކުރުމަށާއި، ނުދައްކާ 234,000 ރުފިޔާ ނަގައިދިނުމަށާއި، ޙަވާލުކުރާ ދުވަހާ ހަމައަށް ކުލި ދައްކަންޖެހޭނެކަމަށް ކަނޑައަޅައިދިނުމަށް ދަޢުވާކުރިއެވެ. ކުއްޔަށް ހިފި ފަރާތުން ވިޔަފާރި ބަނގުރޫޓުވެގެން ކުލި ނުދެއްކުނުކަން އިންކާރު ނުކުރެއެވެ.

އިސްތިއުނާފުކުރި ފަރާތުން ބުނީ، ތަންތަން ޙަވާލުކުރުމަށާއި ޙަވާލުކުރާ ދުވަހާ ހަމައަށް ކުލި ދައްކަންޖެހޭނެކަމަށް ކަނޑައަޅައިދިނުމަށް އެދިފައިވާއިރު އެގޮތަށް ޙުކުމްނުކުރުމަކީ ފަނޑިޔާރުންގެ ޤާނޫނުގެ 5 ވަނަ މާއްދާގެ (ށ) ގެ (1) އާ ޚިލާފަށް ހެއްކާ ޤަރީނާއަށް ރިޢާޔަތްނުކުރުން ކަމަށެވެ.

ކުލީގެ އެއްބަސްވުން ބާޠިލްކޮށް ކުލި ނަގައިދިން ސިވިލް ކޯޓުގެ ޙުކުމުގައި، ކުއްޔަށްދިން ތަންތަން ޙަވާލުކުރުމަށާއި ޙަވާލުކުރާ ދުވަހާ ހަމައަށް ކުލި ދައްކަންޖެހޭނެކަމަށް ކަނޑައަޅައި ނުދީ، ޤާނޫނު ނަންބަރު 13/2010 ގެ 5 ވަނަ މާއްދާގެ (ށ) ގެ (1) އާ ޚިލާފަށް ހެއްކާ ޤަރީނާއަށް ރިޢާޔަތްނުކޮށް މައްސަލަ ނިންމާފައިވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އެއްބަސްވުން ބާޠިލުކުރުމުގެ ޤާނޫނީ ނަތީޖާއެއްގެ ގޮތުން ތަން ޙަވާލުކުރުމަކީ ކުއްޔަށްހިފި ފަރާތަށް ލާޒިމުކަމަކަށް ވާތީއާއި، ޙުކުމުގެ ފަހުން ބޭނުންކުރި މުއްދަތަށް ގެއްލުމުގެ ބަދަލު ނުވަތަ މިޘްލީ ކުލި ހޯދަން ދަޢުވާކުރުމުގެ ޙައްޤު އިސްތިއުނާފުކުރި ފަރާތަށް ލިބިގެންވާތީ، ދަށުކޯޓުގެ ޙުކުމަށް ބަދަލުގެންނަންޖެހޭ ސަބަބެއް ނެތެވެ.