އަޙްމަދު އިސްމާޢީލް ވ. ލަޠީފާ ޢަލީ ޙަސަން

ސިވިލް ކޯޓުން އެއްބަސްވުން ބާޠިލުކޮށް، ޢިމާރާތްތައް ގޯތީގެ ވެރިފަރާތާ ޙަވާލުކުރުމަށް އަމުރުކުރިއެވެ.

މަރުދުވަހަށް ބެލުން ޝަރުޠުކޮށް ގޯތީގެ ޢިމާރާތްތައް ދިނުމުގެ އެއްބަސްވުމަށް ޚިލާފުވެފައިވާތީ އެއްބަސްވުން ބާޠިލުކޮށް ގޯތިން ނެރެދިނުމަށް އެދި ގޯތީގެ ވެރިފަރާތުން ސިވިލް ކޯޓަށް ދަޢުވާ ކުރިއެވެ. ސިވިލް ކޯޓުން ދަޢުވާ ލިބޭ ފަރާތުގެ ޣައިރު ޙާޟިރުގައި ޙުކުމްކުރިއެވެ.

އިސްތިއުނާފުކުރި ފަރާތުން ބުނީ ކޯޓަށް މީހުން ޙާޟިރުކުރުމުގެ ޤަވާޢިދާ ޚިލާފަށް ޣައިރު ޙާޟިރުގައި ޙުކުމްކުރި ކަމަށެވެ. އިސްތިއުނާފު ރައްދުވާ ފަރާތުން އިޖުރާއީ ނުކުތާއެއްގެ ގޮތުގައި ބުނީ އިސްތިއުނާފު ބަލައިގަތުމަށް ދިން ހުއްދައަކީ ސަރކިއުލަރއާއި ޤަވާޢިދާ ޚިލާފު ކަމަށެވެ.

ޣައިރު ޙާޟިރުގައި ކުރި ޙުކުމެއް އިސްތިއުނާފުކުރުމަށް މުއްދަތު ފާއިތުވުމަށްފަހު ދިން ހުއްދައަކީ ސުޕްރީމް ކޯޓުގެ 2015/06/SC ސަރކިއުލަރއާއި 2015/05 ޢާއްމު ސިޓީއާއި ހައިކޯޓުގެ ޤަވާޢިދާ އެއްގޮތަށް ދިން ހުއްދައެއްތޯ، އަދި އެފަދަ މައްސަލައެއްގައި މައުޟޫޢާމެދު ޙުކުމެއް ކުރެވޭތޯ.

އިސްތިއުނާފު ބަލައިގަތުމުގެ ހުއްދަ ޤަވާޢިދާ ޚިލާފު ކަމަށް ކަނޑައަޅައި، މައުޟޫޢާމެދު ޙުކުމެއް ނުކޮށް ނިންމި (ދަށުކޯޓުގެ ޙުކުމް ބަދަލެއް ނުވެ)

ޙުކުމުގެ މަޢުލޫމާތު ލިބުނު ތާރީޚު (ޝަރީޢަތް ނިމުނު ގޮތުގެ ރިޕޯޓު ނެގި ދުވަސް) އިން ފެށިގެން ގާތްގަނޑަކަށް 10 މަސް ފަހުން ހުއްދައަށް އެދުނު ކަމަށާއި، ރިޕޯޓުގެ އާ ކޮޕީއެއް ހުށަހަޅައިގެން އޮޅުވާލުމުގެ ތެރެއިން ހުއްދަ ހޯދި ކަމަށާއި، އެއީ މަޤްބޫލު ސަބަބެއް ނޫންކަމަށް ބަލައި، ހުއްދަ ދިނުމަކީ ޤަވާޢިދާ ޚިލާފު ނިންމުމެއް ކަމަށާއި، ސުޕްރީމް ކޯޓުގެ 2018/SC-A/52 ގައިވާ ފަދައިން މައުޟޫޢާމެދު ޙުކުމެއް ނުކުރެވޭނެ ކަމަށް ނިންމިއެވެ.