އަޙްމަދު އިސްމާޢީލް ވ. ލަޠީފާ ޢަލީ ޙަސަން

ސިވިލް ކޯޓުން، 15 ދުވަހުގެ ތެރޭގައި ތަނުގައި ތިބި މީހުންނާއި މުދަލާއެކު ތަން ހުސްކޮށް މިލްކުވެރިޔާއާ ޙަވާލުކުރުމަށް ފުލުހުންނަށް އަމުރުކޮށް، ތަން ހުސްކުރުމުގައި މުދަލަށް ލިބޭ ގެއްލުމަކަށް ފުލުހުން ޒިންމާ ނުވާނެކަމަށް އެންގިއެވެ.

ސިވިލް ކޯޓުގެ C/2016-CV/984 ޤަޟިއްޔާގައި ބަންޑާރަ ގޯތީގައިވާ ޢިމާރާތްތަކާއި ވަޅުފަދަ ތަންތަން މިލްކުވެރިޔާއާ ޙަވާލުކުރުމަށް ޙުކުމްކުރިނަމަވެސް އެކަން ނުކުރުމުން، ސުޕްރީމް ކޯޓުގެ SC/2015/03 ސަރކިއުލަރގެ ދަށުން ސިވިލް ކޯޓުގެ އިސްނެގުމުގައި ތަންފީޛީ މައްސަލަ (C/2017-CV/2975) ބެލުނެވެ.

އިސްތިއުނާފުކުރި ފަރާތުން ބުނީ، އޭނާގެ ބަސް ނުހޯދައި ޖަވާބުދާރީވުމުގެ ފުރުޞަތު ނުދީ އަމުރު ނެރުނީ ޤާނޫނުއަސާސީގެ 42 (ހ) އާ ޚިލާފަށް ކަމަށާއި، ގެއްލުމުގެ ޒިންމާ ފުލުހުން ނުނަގާނެކަމަށް ކަނޑައެޅުމުން 42 (ށ) އާއި ޤާނޫނުއަސާސީގެ 40 ވަނަ މާއްދާއާ ޚިލާފަށް ތިންވަނަ ފަރާތުގެ ޙައްޤު ގެއްލޭ ކަމަށެވެ.

ޙުކުމް ތަންފީޛުކުރުމަށް ސިވިލް ކޯޓުން ނެރުނު އަމުރު، ޙުކުމް ރައްދުވާ ފަރާތުގެ ބަސް ނުހޯދައި ނެރުމާއި، ތަން ހުސްކުރުމުގައި މުދަލަށް ލިބޭ ގެއްލުމުގެ ޒިންމާ ފުލުހުން ނުނަގާނެކަމަށް ކަނޑައެޅުމަކީ ޤާނޫނުއަސާސީގެ 42 ވަނަ މާއްދާގެ (ހ)، (ށ) އަދި ޤާނޫނުއަސާސީގެ 40 ވަނަ މާއްދާއާ ޚިލާފު ކަމެއްތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

އިސްތިއުނާފުކުރި ފަރާތް ޙާޟިރުކުރުމަށް ސިވިލް ކޯޓުން ހުރިހާ ފިޔަވަޅެއް އެޅުމަށްފަހު ޣައިރު ޙާޟިރުގައި އަމުރު ނެރުނީ ކަމަށާއި، ހެޔޮ ނިޔަތުގައި ޙުދޫދުގެ ތެރެއިން ތަންފީޛުކުރާ އިދާރާއަކަށް ގެއްލުމުގެ ޒިންމާ ނުއުފުލޭނެ ކަމަށާއި، އަމުރަކީ ޝަރުޢީ ނުވަތަ ޤާނޫނީ އުޞޫލަކާ ޚިލާފަށް ނެރެފައިވާ އަމުރެއް ނޫން ކަމަށެވެ.