އަޙްމަދު އާޠިފް ވ. މިންޓް ޕވޓ ލޓޑ

ސިވިލް ކޯޓުން، އަގު ނުދެއްކުމުގެ ސަބަބުން އެއްބަސްވުމުގެ ދަށުން ލިބިގެންވާ އިޚްތިޔާރުގެ ދަށުން އެއްބަސްވުން ބާޠިލުކޮށް އުޅަނދު ގެންދިޔަކަން ސާބިތުވާތީ، ބަދަލާއި އުޅަނދު ހޯދައެއް ނުދެވޭނެކަމަށް ޙުކުމްކުރިއެވެ.

23 އޮކްޓޯބަރު 2014 ގައި ވެވުނު އެއްބަސްވުމެއްގެ ދަށުން ސަފާރީ އުޅަނދެއް US$500,000 އަށް ގަތުމަށް އިސްތިއުނާފުކުރި ފަރާތް އެއްބަސްވެ، އުޅަނދާ ޙަވާލުވިއެވެ. 327 ދުވަހުގެ ތެރޭގައި ދައްކާފައިވަނީ US$39,455 ކަމުން، ވިއްކި ކުންފުނިން އެއްބަސްވުން ބާޠިލުކޮށް އުޅަނދު އަނބުރާ ގެންދިޔައެވެ. ގަންނަ ފަރާތުން ގެއްލުމުގެ ބަދަލުގައި US$978,710.78 އާއި އުޅަނދު އަނބުރާ ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތް ބުނީ އުޅަނދު ގެންދިޔައީ އެއްބަސްވުމުގެ 10.7 އާއި ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާއި ޤާނޫނުއަސާސީގެ 42 (ށ) އާ ޚިލާފަށް ކަމަށާއި، އުޅަނދު ދުއްވޭ ޙާލަތަށް ގެނައުމަށް ކުރި ޚަރަދު ސާބިތުކުރުމަށް ހުށަހެޅި ހެކިން ޙާޟިރުނުކުރުމަކީ ޤާނޫނުއަސާސީގެ 62 (ށ) އާއި 65 ވަނަ މާއްދާއާ ޚިލާފު ކަމެއްކަމަށެވެ. ކުންފުނިން ބުނީ އުޅަނދު ބަލައި ޙަވާލުވީ ކަމަށާއި، ފަހުން ފާހަގަކުރާ ކަންތައްތަކަކީ އަގު ނުދެއްކުމަށް ހޯދާ ސަބަބެއްކަމަށެވެ.

އުޅަނދު ވިއްކުމުގެ އެއްބަސްވުމުގެ ދަށުން ގަންނަ ފަރާތުން އަގު ނުދެއްކުމުން ވިއްކާ ފަރާތުން އެއްބަސްވުން ބާޠިލުކޮށް އުޅަނދު އަނބުރާ ގެންދިއުމަކީ އެއްބަސްވުމުގެ 10.7 ވަނަ މާއްދާއާއި ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފު ޢަމަލެއްތޯ، އަދި ގަންނަ ފަރާތަށް ގެއްލުމުގެ ބަދަލާއި އުޅަނދު އަނބުރާ ހޯދައިދޭންޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އެއްބަސްވުމުގައިވާ ގޮތަށް 165 ދުވަހުގެ ތެރޭގައި އަގު ނުދައްކާތީ 10.7 ގެ ދަށުން ބާޠިލުކުރުމުގެ ބާރު ވިއްކާ ފަރާތަށް ލިބުނެވެ. ނޯޓިސް މުއްދަތަށްވުރެ ދިގު މުއްދަތެއް ދީފައި ގެނައުމަކީ އެއްބަސްވުމާ ޚިލާފު ކަމެއް ނޫނެވެ. ސިޓީ ޙަވާލުކުރިކަމާއި ގެއްލުން ސާބިތުކުރާ ކާފީ ހެކި އިސްތިއުނާފުކުރި ފަރާތުން ހުށަނާޅާތީ، ސާބިތުކުރުމުގެ ބުރަ އޭނާ އުފުލާފައެއް ނުވެއެވެ.