ޢަބްދުއްސައްތާރު އިބްރާހީމް ވ. ޢާބިދާ މުޙައްމަދު

472,200 ރުފިޔާގެ ކުލިއާއި 1,087,936 ރުފިޔާގެ ޖޫރިމަނާއާއެކު 1,560,136 ރުފިޔާ ދައްކަންޖެހޭކަން ސާބިތުވާކަމަށް ކަނޑައަޅައި، 8 މަސްދުވަހުގެ ތެރޭގައި ދައްކަން ސިވިލް ކޯޓުން ޙުކުމްކުރިއެވެ.

އިސްތިއުނާފު ރައްދުވި ފަރާތުގެ ފިރިމީހާ ދިރިހުއްޓާ 2008 ގައި ޢިމާރާތެއް ކުއްޔަށް ދިނުމަށް އިސްތިއުނާފުކުރި ފަރާތާއެކު ކުލީގެ އެއްބަސްވުމެއް ހެދިއެވެ. ފިރިމީހާ ވަފާތުވުމުން ތަރިކައިން އެ ޢިމާރާތް ލިބުނު އަނބިމީހާ، 2012 ޖޫން އިން 2013 އޮގަސްޓާ ހަމައަށް ނުދައްކާ ކުލީގެ ފައިސާއާއި ޖޫރިމަނާ ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ހޯދަން އެދޭ ފައިސާގެ ތަފްޞީލް ހުށަނާޅާތީ ޖަވާބުދާރީވުމަށް ހުރަސް އެޅި ޤާނޫނުއަސާސީގެ 42 (ށ) އާ ޚިލާފުވެފައިވާ ކަމަށާއި، އެއްބަސްވުމުގެ 6 ވަނަ މާއްދާއަށް ބިނާކޮށް ޖޫރިމަނާ ކުރީ ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފަށް ކަމަށެވެ.

ވަފާތުވި މީހަކު ހަދާފައިވާ ކުލީގެ އެއްބަސްވުމެއްގެ ދަށުން ލިބެންޖެހޭ ކުލި، ތަރިކައިން އެ ޢިމާރާތް ލިބުނު ވާރިޘަށް ހޯދިދާނެތޯއާއި، ދަޢުވާގައި ފައިސާގެ ތަފްޞީލް ނެތުމުން ޤާނޫނުއަސާސީގެ 42 (ށ) އާ ޚިލާފުވޭތޯއާއި، އެއްބަސްވުމުގެ ޖޫރިމަނާގެ މާއްދާއަށް ބިނާކޮށް ޖޫރިމަނާ ދައްކަން ޙުކުމްކުރުމަކީ ކޮންޓްރެކްޓާބެހޭ ޤާނޫނުގެ 20 ވަނަ މާއްދާއާ ޚިލާފު ކަމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ތަރިކައިން ޢިމާރާތް ލިބުނު ވާރިޘަށް ކުލި ލިބެންޖެހޭކަމާއި، ދަޢުވާގެ މުއްދަތާއި ކުލީގެ ޢަދަދާއި ޖޫރިމަނާގެ ރޭޓް އެއްބަސްވުމުން ސާފުކޮށް އެނގޭތީ ތަފްޞީލް ނެތުމުގެ ނުކުތާއަށް އަސާސެއް ނެތްކަމާއި، ޖޫރިމަނާގެ ބުނިޔާދާއި ވަގުތު އެއްބަސްވުމުގައި ސާފުކޮށް ބަޔާންކޮށްފައިވާތީ ޤާނޫނުގެ 20 ވަނަ މާއްދާއާ ޚިލާފުނުވާކަމަށް ކޯޓުން ނިންމިއެވެ.