ޢަބްދުއްރަހީމް ޙަސަން ވ. މޫސާ މަނިކުފާނު

ސިވިލް ކޯޓުން ކުލި ނުދެއްކުމުން އެއްބަސްވުން ބާޠިލުކަމަށް ކަނޑައަޅައި، ކުލި 540,000 ރުފިޔާއާއި ޖޫރިމަނާ 46,655 ރުފިޔާއާއި ބިލުތައް ދައްކަން ކަނޑައަޅައި ޣައިރު ޙާޟިރުގައި ޙުކުމްކުރި.

ޢިމާރާތެއް 15 އަހަރަށް ކުއްޔަށް ހިފި ފަރާތުން، އެ ޢިމާރާތުގެ ބުރިއެއްގައި ވެރިފަރާތާ ވި އެއްބަސްވުމެއްގެ ދަށުން އުޅުނު ފަރާތުގެ އެއްބަސްވުމުގެ މުއްދަތު ހަމަވުމުން މަހަކު 10,000 ރުފިޔާ ކުލި ކަނޑައަޅައި، ބައެއް މުއްދަތަކަށް ކުލި ލިބުނު ނަމަވެސް ފަހުން ކުލި ނުދެއްކުމުން ކުލި، ޖޫރިމަނާ އަދި ބިލުތަކަށް ދަޢުވާކުރި.

އިސްތިއުނާފުކުރި ފަރާތުން ބުނީ ތަން ކުއްޔަށް ހިފީ ވެރިފަރާތުން ކަމަށާއި، ދަޢުވާކުރި ފަރާތާ އެއްވެސް އެއްބަސްވުމެއް ނެތްކަމަށާއި، ދަށުކޯޓުން ހެކި ވަޒަންނުކޮށް، ސާބިތުވި ހަމަ ބަޔާންނުކޮށް، ޖަވާބުދާރީވުމުގެ ފުރުޞަތު ނުދީ ނިންމި ކަމަށް.

ބޮޑު ލީސެއްގެ ދަށުން ޢިމާރާތެއް ކުއްޔަށް ހިފި ފަރާތަށް، އެ ޢިމާރާތުގެ ބުރިއެއްގައި އުޅުނު ފަރާތުން ކުލިއާއި ބިލުތައް ދައްކަންޖެހޭތޯއާއި، އެއްބަސްވުމެއް ސާބިތުނުވާއިރު ކުލި ލަސްވުމުގެ ޖޫރިމަނާ ނަގައިދެވޭތޯ.

ބައެއް ބަދަލުކުރި (ކުލި ލަސްވުމުގެ ޖޫރިމަނާގެ ބައި ބާޠިލުކޮށް، ކުލީގެ ފައިސާއާއި ބިލުތަކާބެހޭ ނިންމުންތައް ޤާއިމްކުރި)

ވެރިފަރާތުގެ ހެކިބަހުން ތަން ކުއްޔަށް ދީފައިވަނީ ދަޢުވާކުރި ފަރާތަށް ކަމާއި، ފައިސާ ގަދަކަމުން އަތުލިކަމަށް ބުނާ ވާހަކަ ހެކިން ސާބިތު ނުވާކަމާއި، ތަނުގައި އުޅުނު ފަރާތަށް ކުލިއާއި ބިލުތައް ދައްކަން ޖެހޭކަމާއި، ނަމަވެސް ޖޫރިމަނާއަށް އެއްބަސްވިކަން ސާބިތުނުވާތީ އަދި ދަށުކޯޓުން އޭގެ ސަބަބު ބަޔާންނުކުރާތީ ޖޫރިމަނާ ނަގައިނުދެވޭކަން.