ޠަލްޢަތު މުޙައްމަދު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ޓެރަރިޒަމްގެ ޢަމަލެއް ކުރުމުގައި ބައިވެރިވުމުގެ ކުށް ސާބިތުވާކަމަށް ކަނޑައަޅައި، ޤާނޫނުގެ 6 ވަނަ މާއްދާގެ (ނ) ގެ ދަށުން 17 އަހަރުގެ ޖަލު ޙުކުމް ކުރި.

2015 ނޮވެމްބަރު 2 ގައި ތުހުމަތުކުރެވޭ ފަރާތާއި އިތުރު ތިން މީހަކު ބައިވެރިވެގެން އައި.އީ.ޑީއެއް ހަދައި، މާލޭ މުލިއާގޭ ކައިރީ ނޫރާނީ ގޯޅީގައި ޕާކުކޮށްފައިވާ ޕިކަޕެއްގެ ބެޓެރި (ފިއުލް ޓޭންކް) މަތީގައި ބެހެއްޓި ކަމަށް ދަޢުވާކުރި.

އިސްތިއުނާފުކުރި ފަރާތުން ބުނީ އިންސިޑެންޓް ރިޕޯޓެއް އެކްސްޕާޓް ރިޕޯޓެއްގެ ގޮތުގައި ބަލައިގަނެފައިވާކަމަށާއި، ހެކި ފުދުނުކަމަށާއި، ފެއަރ ލޭބަލިންގ އުޞޫލާ ޚިލާފުކަމަށާއި، އައި.އީ.ޑީއެއްކަން ފޮރެންސިކުން ކަށަވަރުނުކުރާކަމަށާއި، ޗެއިން އޮފް ކަސްޓަޑީ ނެތްކަމަށާއި، އެއީ މަޖަލަކަށް ހެދި ފޭކު އެއްޗެއްކަމަށް.

ޢާންމު ސަރަޙައްދެއްގައި ޕާކުކޮށްފައިވާ ޕިކަޕެއްގެ ބެޓެރި މަތީގައި އައި.އީ.ޑީއެއް ބެހެއްޓުމުގައި ބައިވެރިވުމުން ޓެރަރިޒަމް މަނާކުރުމުގެ ޤާނޫނުގެ 6 ވަނަ މާއްދާގެ ދަށުން ޓެރަރިޒަމްގެ ޢަމަލެއް ކުރުމުގައި ބައިވެރިވުމުގެ ކުށް ސާބިތުވޭތޯއާއި، އެ އެއްޗަކީ ގޮވާ އެއްޗެއްކަން ކަނޑައެޅުމަށް ހުށަހެޅި އެކްސްޕާޓް އޮޕީނިއަން ރިޕޯޓާއި އިންސިޑެންޓް ރިޕޯޓު ބަލައިގަތުން ޞައްޙަތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ޝަރީޢަތުގައި ވެފައިވާ އިޢުތިރާފާއި ބައިވެރިއެއްގެ އިޢުތިރާފާއި ވީޑިއޯ ފުޓޭޖާއި ފުލުހުންގެ ހެކިބަހުން ބައިވެރިވިކަން ސާބިތުވޭ؛ އީ.އޯ.ޑީ ޓީމުގެ ޚަބީރު ޝަރީޢަތަށް ޙާޟިރުކޮށް ހެކިބަސް ނަގާފައިވާތީ 2011/SC-A/31 ގެ އުޞޫލާ އެއްގޮތަށް އޭނާގެ ރައުޔު ބަލައިގަނެވޭ؛ ބެހެއްޓި ތަނާއި ގޮތުން ޢާންމުންނަށް ބިރުދެއްކުމުގެ މަޤްޞަދު އެނގޭ.