ރީތިރަށް ރިސޯޓް ޕްރައިވެޓް ލިމިޓެޑް ވ. މަޢުރޫފް ޛާކިރު

ސިވިލް ކޯޓުން، ރީއިންސްޓޭޓް ކުރުމަކީ ކަރުދާހެއްގައި ލިޔުމުން ފުރިހަމަވާ ކަމެއް ނޫންކަމަށާއި ކުންފުނިން ހެޔޮނިޔަތުގައި ޙުކުމް ތަންފީޛުކޮށްފައި ނުވާކަމަށް ކަނޑައަޅައި، 30 ދުވަހުގެ ތެރޭގައި ކުރީގެ ވަޒީފާއަށް ރުޖޫޢަކޮށް ނުދެވި އޮތް މުސާރައާއި ޢިނާޔަތް ދިނުމަށް ޙުކުމްކުރިއެވެ.

ވަޒީފާއާބެހޭ ޓްރައިބިއުނަލުގެ 21/VTR/2009 ނިންމުމާއި މަދަނީ ކޯޓުގެ 2788/MC/2009 ޙުކުމުން، މަޢުރޫފް ޛާކިރު ކުރިން ހުރި ސީނިއަރ ހެޑްވެއިޓަރގެ މަޤާމަށް ރުޖޫޢަކޮށް މުސާރައާއި ޢިނާޔަތާއި ބަދަލު ދިނުމަށް ރީތިރަށް ރިސޯޓް ޕްރައިވެޓް ލިމިޓެޑަށް އަންގާފައިވިއެވެ. ކުންފުނިން ފައިސާ ދީ، ކުރީގެ މަޤާމަށް ރުޖޫޢަކުރިކަމަށް ސިޓީ ފޮނުވުމަށްފަހު މާލޭ އޮފީހުގެ ލޮޖިސްޓިކް ކޯޑިނޭޓަރގެ މަޤާމަކަށް ބަދަލުކުރުމުން، ޙުކުމް ތަންފީޛުކޮށްދިނުމަށް އެދި ސިވިލް ކޯޓަށް ދަޢުވާކުރިއެވެ.

ކުންފުނިން ބުނީ ޙުކުމް ތަންފީޛުކޮށް ނިމިފައިވާ ކަމަށާއި، 'ރީއިންސްޓޭޓް' ގެ މާނައެއް ޤާނޫނުގައި ނެތް ކަމަށާއި، މަޤާމު ބަދަލުކުރުމަކީ ޓްރައިބިއުނަލުގެ މައްސަލައިގެ މައުޟޫޢާ ތަފާތު އައު މައްސަލައެއް ކަމުން ސިވިލް ކޯޓަށް އިޚްތިޞާޞް ނެތް ކަމަށާއި، ޓްރައިބިއުނަލުން ކަނޑައެޅި މިންވަރަށްވުރެ ގިނައިން މުސާރަ ދިނުމަށް ޙުކުމްކުރި ކަމަށެވެ. މުވައްޒަފު ބުނީ ކުރީގެ މަޤާމަށް ރުޖޫޢަކޮށްފައި ނުވާ ކަމަށެވެ.

ވަޒީފާއާބެހޭ ޓްރައިބިއުނަލުން މުވައްޒަފަކު ވަޒީފާއަށް ރުޖޫޢަކުރުމަށް ނިންމި ނިންމުން ތަންފީޛުކުރުމުގެ މައްސަލައެއްގައި، މުވައްޒަފު ކުރިން ހުރި މަޤާމަށް ރުޖޫޢަކުރުމަށްފަހު އެހެން މަޤާމަކަށް ބަދަލުކުރުމާ ގުޅޭ ޚިލާފަކީ ސިވިލް ކޯޓުގެ އިޚްތިޞާޞް ހިނގާ ކަމެއްތޯއާއި، 'ރީއިންސްޓޭޓް' ކުރުމުގެ މާނައަކީ ކޮބައިތޯ.

ދަށުކޯޓުގެ ޙުކުމް ބާޠިލު

ޙުކުމްގައިވާ ފައިސާ ދީ، ކުރީގެ މަޤާމަށް ރުޖޫޢަކުރިކަން އެންގުމުން ޙުކުމް ތަންފީޛުވެ ނިމިފައިވެއެވެ. އޭގެ ފަހުން މަޤާމު ބަދަލުކުރުމާ ގުޅޭ ޚިލާފަކީ ވަޒީފާއާބެހޭ ޓްރައިބިއުނަލުގެ އިޚްތިޞާޞް ހިނގާ ކަމެއް ކަމުން، ސިވިލް ކޯޓުން ގޮތެއް ކަނޑައެޅީ އެ ކޯޓުގެ އިޚްތިޞާޞް ނުހިނގާ ކަމެއްގައެވެ.