ސިވިލް ސަރވިސް ކޮމިޝަން ވ. އިބްރާހީމް އަފީފް

ވަޒީފާއާބެހޭ ޓްރައިބިއުނަލުން، މުވައްޒަފު ކޮށްފައިވާ ޢަމަލަކީ ކޮބައިކަން ނުބުނާތީއާއި އިޖުރާއީ ޢަދުލުވެރިކަން ޤާއިމުކުރިކަން ސާބިތު ނުކުރާތީ، ވަކިކުރީ ވަޒީފާއާބެހޭ ޤާނޫނާ ޚިލާފަށްކަމަށް ކަނޑައަޅައި، ވަޒީފާއަށް އަނބުރާ ރުޖޫޢުކޮށް ވަކިކުރި ދުވަހުން ފެށިގެން މުސާރައާއި ޢިނާޔަތްތައް ދިނުމަށް އަމުރުކުރިއެވެ.

އޭވިއޭޝަން ސެކިއުރިޓީ ކޮމާންޑުގައި ވަޒީފާ އަދާކުރި ސިވިލް ސަރވިސްގެ މުވައްޒަފަކު، އިންޓެލިޖެންސުން ދިފާޢީ ވުޒާރާއަށް ދިން ސިއްރު މަޢުލޫމާތާއި ސެކިއުރިޓީ އެސެސްމަންޓެއްގެ މައްޗަށް ބިނާކޮށް، ޤައުމީ ސަލާމަތާ ގުޅޭ ވަޒީފާއެއްގައި ހުންނަ މުވައްޒަފެއްގެ މައްޗަށް އޮންނަންޖެހޭ އިތުބާރު ގެއްލިފައިވާކަމަށް ބުނެ ސިވިލް ސަރވިސް ކޮމިޝަނުން ނޯޓިސް ނުދީ ވަޒީފާއިން ވަކިކުރިއެވެ.

ސިވިލް ސަރވިސް ކޮމިޝަނުން ބުނީ، ޤަވާއިދުގެ 273 ގެ ދަށުން ގެއްލުން ލިބިދާނެ ޙާލަތުގައި ޖަވާބުދާރީވުމުގެ ފުރުޞަތު ނުދީ ވަކިކުރެވޭތީ އިޖުރާއީ ޢަދުލުވެރިކަން ފުރިހަމަނުވާކަމަށް ނިންމީ ރަނގަޅަށް ނޫންކަމަށާއި، ވަޒީފާއަށް އަނބުރާ ރުޖޫޢުކުރުމަކީ ކޯޓަށް ލިބިގެންވާ އިޚްތިޔާރެއް ކަމަށްވާއިރު މައްސަލައިގެ ވަށައިގެންވާ ކަންކަމަށް ނުބަލާ އެ އަމުރު ނެރުނުކަމަށެވެ.

ޤައުމީ ސަލާމަތާ ގުޅޭ ވަޒީފާއެއްގައި ހުރި ސިވިލް ސަރވިސްގެ މުވައްޒަފަކު، އިތުބާރު ގެއްލިފައިވާކަމަށް ބުނެ ނޯޓިސް ނުދީ އަދި ޖަވާބުދާރީވުމުގެ ފުރުޞަތު ނުދީ ވަޒީފާއިން ވަކިކުރުމުގައި އިޖުރާއީ ޢަދުލުވެރިކަން ޤާއިމުކޮށްފައިވޭތޯ؛ އަދި ޤާނޫނާ ޚިލާފަށް ވަކިކުރިކަމަށް ކަނޑައެޅުމުން ވަޒީފާއަށް އަނބުރާ ރުޖޫޢުކުރުމަށް އަމުރުކުރުން ރަނގަޅުތޯ.

ބައެއް ބަދަލުކުރި: ވަޒީފާއަށް އަނބުރާ ރުޖޫޢުކުރުމުގެ އަމުރު ބާޠިލުކޮށް، ވަކިކުރި ތާރީޚުން ޓްރައިބިއުނަލުން ނިންމި ތާރީޚާ ހަމައަށް މުސާރައާއި ޢިނާޔަތްތައް ދިނުމަށް އަމުރުކުރި

ކޮމިޝަނުން ހުށަހެޅި ޔައުމިއްޔާއާއި ލިޔުންތަކުގައި މުވައްޒަފު ކުރި ޢަމަލެއް ބަޔާންކޮށްފައި ނެތުމާއި، ތުހުމަތު އޭނާއަށް ނޭންގުމާއި، ގެއްލުން ލިބިދާނެކަމަށް ފެނުނު ހަމައަކީ އެކަށީގެންވާ ހަމައެއްކަން ސާބިތު ނުކުރުމުން އިޖުރާއީ ޢަދުލުވެރިކަން ޤާއިމު ނުވެއެވެ. ނަމަވެސް ޤައުމީ ސަލާމަތާ ގުޅޭ ވަޒީފާއެއްގައި އިތުބާރު މުހިއްމުވާތީ، 2011/HC-A/128 ގެ އުޞޫލުގެ މަތިން ދެފަރާތުގެ މަސްލަޙަތަށް ބަލައި، ވަޒީފާއަށް އަނބުރާ ރުޖޫޢުކުރުމަކީ އެންމެ މަސްލަޙަތު ހުރި ގޮތެއްކަމަށް ނުފެނުނެވެ.