ޤުރައިޝާ ސާމާ ވ. މުޙައްމަދު ރަމީޒް

ސިވިލް ކޯޓުން، ބެހެނިވެރިން ސޮއިކުރި ކުރެހުމުގެ މައްޗަށް ސިޓީ ކައުންސިލުން ތައްޔާރުކުރި ސްކޭލްޑް ޗާޓާ އެއްގޮތަށް، ކޮންމެ ބެހެނިވެރިއަކަށް އަމިއްލަ ބިމުގެ ބަޔާއި 284 އަކަފޫޓުގެ ބަންޑާރަ ބިން ހަމަޖައްސައި، ބިމުގައިވާ ޢިމާރާތްތަކާއި ނުއުފުލޭ މުދާ އެމީހަކަށް މިލްކުވާކަމަށް ނިންމިއެވެ.

ގޯތި ބައިކުރުމަށް ސަރވޭކުރިއިރު ގޯތީގެ ބޮޑުމިނަށް 568 އަކަފޫޓުގެ ބަންޑާރަ ބިން އިތުރުވެފައިވުމުން، އެބިމުގެ ދެބައިކުޅަ އެއްބައި (284 އަކަފޫޓު) އާއި އަމިއްލަ ބިމުގެ ތިންބައިކުޅަ ދެބައި ވަކިކޮށްދިނުމަށް އެދި ބެހެނިވެރިއަކު ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ބަޔާނުގައި އޭނާ ސޮއިކޮށްފައި ނުވާކަމަށާއި، ޗާޓަކީ ދަޢުވާކުރި ފަރާތުން ކުރެހި ޗާޓެއްކަމަށާއި، ޣައިރު ޙާޟިރުގައި ނިންމިއިރު އިޖްރާއާތު ފުރިހަމަ ނުކުރާކަމަށާއި، ދަޢުވާގެ އަސްލާ ޚިލާފަށް ކުރިން ބެހި ބިންވެސް ހިމަނައިގެން ޙުކުމްކުރިކަމަށާއި، ބިމާބެހޭ ޤާނޫނުގެ 15 ވަނަ މާއްދާއާއި ޤަވާޢިދާ ޚިލާފަށް ނިންމިކަމަށެވެ.

ގޯތީގެ ބޮޑުމިނަށް އިތުރުވި ބަންޑާރަ ބިމާއި އަމިއްލަ ބިން ބެހެނިވެރިންނަށް ވަކިކޮށް ޢައްޔަންކުރުމުގައި، ބެހެނިވެރިން ޝަރީޢަތުގައި ސޮއިކުރި ކުރެހުމުގެ މައްޗަށް ތައްޔާރުކުރި ސްކޭލްޑް ޗާޓަށް ބިނާކުރުމާއި، އިސްތިއުނާފުކުރި ފަރާތުގެ ބަދަލުގައި ޙާޟިރުވި ފަރާތަށް ޙާޟިރުވުމުގެ އަމުރު ނުފޮނުވާ މައްސަލަ ނިންމިކަމަށް ބުނާ ނުކުތާ ޞައްޙަތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަޢުވާގެ އަސްލަކީ އަމިއްލަ ބިންވެސް ހިމެނޭގޮތަށް ބިން ޢައްޔަންކުރުން ކަމުންނާއި، އިތުރު ބަންޑާރަ ބިމަކީ ދެބެހެނިވެރިން ހިމެނޭގޮތަށް ރަޖިސްޓްރީކުރެވިފައިވާ ބިމަކަށް ވާތީއާއި، އިސްތިއުނާފުކުރި ފަރާތުގެ ބަދަލުގައި ޙާޟިރުވި ފަރާތުން ކުރެހުމުގައި ސޮއިކޮށްފައިވާތީއާއި، ޙާޟިރުވުމުގެ އަމުރު ޙަވާލުކޮށްފައިވާކަން ރެކޯޑުން އެނގޭތީ، ދަށުކޯޓުގެ ޙުކުމް ޤާއިމްކުރިއެވެ.