ޕްރޮސިކިއުޓަރ ޖެނެރަލް ވ. ނެތް

ކްރިމިނަލް ކޯޓުން ނިންމީ ފުރަން އުޅޭކަމުގެ ހެކި ފޯމުގައި ނެތްކަމަށާއި، ރާއްޖޭގައި ނެތް މީހެއްގެ މައްޗަށް ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 75 ވަނަ މާއްދާ ތަޠްބީޤު ނުކުރެވޭތީ އަމުރެއް ނެރުމުގެ ބޭނުންތެރިކަމެއް ނެތްކަމަށެވެ.

ޖިންސީ ކުށްތަކުގެ ދަޢުވާ ކުރިއަށްދާ ތުހުމަތުކުރެވޭ ފަރާތަކަށް ފަރުވާއަށް 1 މަހަށް ރާއްޖެއިން ފުރުމުގެ ހުއްދަ ދިނުމުން ފުރައިގެން ގޮސް އެނބުރި ނައުމުން، ފުލުހުން އޭނާގެ ޕާސްޕޯޓު ހިފެހެއްޓުމުގެ އަމުރަކަށް ކްރިމިނަލް ކޯޓުން އެދުނެވެ.

ދައުލަތުން ބުނީ 75 (ރ) ގެ ތިން ޝަރުޠު ފުރިހަމަވާކަމަށާއި، ފިލަން އުޅޭ މީހެއްގެ ޕާސްޕޯޓު ހިފެހެއްޓޭނަމަ ފިލައިގެން ގޮސްފައިވާ މީހެއްގެ ޕާސްޕޯޓު ހިފެހެއްޓުން މާ އައުލާކަމަށާއި، 2021/SC-A/08 އާއި 2021/HC-B12/48 އާ ޚިލާފަށް ނިންމީކަމަށެވެ.

ދިވެހިރާއްޖެއިން ފުރައިގެން ގޮސް ބޭރުގައި ހުރި (ޝަރީޢަތަށް ފިލައިގެން އުޅޭކަމަށް ބުނާ) މީހެއްގެ މައްޗަށް، ޖިނާއީ އިޖުރާއަތުގެ ޤާނޫނުގެ 75 ވަނަ މާއްދާގެ ދަށުން ފުރުން މަނާކޮށް ޕާސްޕޯޓު ނުވަތަ ޓްރެވަލް ޑޮކިއުމަންޓް ހިފެހެއްޓުމުގެ އަމުރެއް ނެރެވިދާނެތޯ.

އިސްތިއުނާފު ބާޠިލް، ދަށުކޯޓުގެ ނިންމުން ޤާއިމް

ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 75 ވަނަ މާއްދާއާއި ގަވާއިދުގެ ފޯމާއި ނަމޫނާއިން ތަޞައްވުރުކޮށްފައިވަނީ ރާއްޖެއިން ފުރުމުގެ ކުރިން ނެރޭ ފުރުން މަނާކުރާ އަމުރަކަށް ކަމަށްވާތީ، ރާއްޖެއިން ބޭރުގައި ހުރި މީހެއްގެ މައްޗަށް އެ އަމުރު ނެރެވޭނެ ޤާނޫނީ ހަމައެއް ދައުލަތަށް ނުދެއްކުނެވެ. ދައުލަތުން ހުށަހެޅި ދެ ޤަޟިއްޔާގެ ވާޤިޢާތައް ތަފާތެވެ.