ޕްރޮސިކިއުޓަރ ޖެނެރަލް ވ. ނަން ސިއްރުކުރެވިފައި

ޤާނޫނު ނަންބަރު 12/2009 ގެ 47 ވަނަ މާއްދާގައިވާ މިންވަރަށާއި ޤާނޫނުއަސާސީގެ 51 ވަނަ މާއްދާގެ (އ)ގެ މިންވަރަށް ހެކި ނުލިބޭތީ ދަޢުވާ ސާބިތުނުވާކަމަށް ކްރިމިނަލް ކޯޓުން ޙުކުމްކުރިއެވެ.

ކުޑަކުއްޖަކު ބޭރުގައި ޑޮކްޓަރަށް ދެއްކުމުން ޖިންސީ އަނިޔާއެއް ލިބިފައިވާކަމަށް ޝައްކުކުރެވި، ކުއްޖާ ބުނިކަމަށް ބުނެ ޢާއިލާގެ މީހުން ކިޔައިދިން ވާހަކަތަކަށް ބިނާކޮށް، ކުއްޖާއާ ގާތް ގުޅުމެއްހުރި ތުހުމަތުކުރެވޭ ފަރާތުގެ މައްޗަށް އިތުބާރުކުރެވޭ މަޤާމެއްގައިހުރެ ޖިންސީ ޢަމަލެއް ހިންގުމުގެ ދަޢުވާ ކުރެވުނެވެ.

ދައުލަތުން ބުނީ ކުއްޖާ އެކި މީހުންނަށް ކިޔައިދިނުން އެއްގޮތްވެ، މެޑިކޯ ލީގަލް އަދި ސައިކޮލޮޖިކަލް ރިޕޯޓުތަކުން ބާރުލިބޭތީ ދަޢުވާ ސާބިތުވާކަމަށާއި، ތުހުމަތުކުރެވޭ ފަރާތާ ގާތްތިމާގެ ދިފާޢީ ހެކިވެރިއެއްގެ ބަސް ބަލައިނުގަނެވޭނެ ކަމަށެވެ. ދިފާޢުން ބުނީ ދަޢުވާގެ ސީޣާ ސާފުނޫންކަމަށާއި، ކުއްޖާއަށް ލައިދީފައިވާ ވާހަކަތަކެއް ކަމަށާއި، ހަރުދަނާ ޤަރީނާއެއް ނެތްކަމަށެވެ.

އިތުބާރުކުރެވޭ މަޤާމެއްގައިހުރެ ކުޑަކުއްޖަކާއެކު ޖިންސީ ޢަމަލެއް ހިންގުމުގެ ދަޢުވާ ސާބިތުނުވާކަމަށް ކްރިމިނަލް ކޯޓުން ކަނޑައެޅީ، ޤާނޫނު ނަންބަރު 12/2009 ގެ 47 ވަނަ މާއްދާގެ ދަށުން ކުއްޖާ ކިޔައިދިނުމަށް ބިނާކޮށް ހެކި ވަޒަންކުރުމުގެ އުޞޫލުތަކާއި ޤާނޫނުއަސާސީގެ 51 ވަނަ މާއްދާގެ (އ)އާ ޚިލާފަށްތޯ؛ އަދި ތުހުމަތުކުރެވޭ ފަރާތާ ގާތްތިމާގެ ފަރާތެއްގެ ދިފާޢީ ހެކިބަސް ބަލައިގަތުމަކީ ސުޕްރީމް ކޯޓުގެ 2012/SC-A/01 ގެ އުޞޫލާ ޚިލާފު ކަމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (ގިނަ ރައުޔުން)

ގިނަ ރައުޔަކީ، ކުއްޖާ ކިޔައިދިން ރެކޯޑިން ހުށަނާޅާ، ކުއްޖާ ބުނިކަމަށް އެހެން މީހުން ބުނާ ވާހަކަތައް ލައިދީގެން ހޯދާފައިވާ ޖަވާބުތަކަކަށް ވެފައި، ތުހުމަތުކުރެވޭ ފަރާތާ ޢަމަލު ގުޅުވާލެވޭ އެހެން ހެއްކެއް ނެތުމުން ކުށް ސާބިތުނުވާ ކަމެވެ. ފަނޑިޔާރު ޙުސައިން މަޒީދުގެ ޚިލާފު ރައުޔަކީ، 2019/SC-A/77 އަދި 2020/SC-A/94 ގެ އެތެރެފުށާއި ބޭރުފުށުން އެއްގޮތްވުމުގެ ޓެސްޓު ފުރިހަމަވާތީ ކުށް ސާބިތުވާ ކަމެވެ.