ޕްރޮސިކިއުޓަރ ޖެނެރަލް ވ. ނަޖާބަތު ލަޠީފް

ދަޢުވާ ކުރީ ޤާނޫނު ނަންބަރު 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 17 ވަނަ މާއްދާގެ (ށ) ގެ މުއްދަތު ފާއިތުވީފަހުން ކަމަށް ކަނޑައަޅައި، މައްސަލައަކީ މައުޟޫޢީ ގޮތުން ކުރިއަށް ގެންދެވޭނެ މައްސަލައެއް ނޫންކަމަށް މެޖިސްޓްރޭޓް ކޯޓުން ނިންމިއެވެ.

ތޫނު އެއްޗަކުން ހަމަލާދީ ޒަޚަމްކުރި މައްސަލައެއްގައި 21 މޭ 2023 ގައި ތުހުމަތުކުރެވޭ ފަރާތް ހައްޔަރުކުރިއެވެ. ޕްރޮސިކިއުޓަރ ޖެނެރަލް ދެފަހަރު 15 ދުވަހުން ތަޙްޤީޤުގެ މުއްދަތު އިތުރުކޮށް، 4 ޖުލައި 2023 ގައި ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ދަޢުވާ ކުރިއެވެ.

ދައުލަތުން ބުނީ ތަޙްޤީޤުގެ މުއްދަތު އިތުރުކުރުމަކީ ޕްރޮސިކިއުޓަރ ޖެނެރަލްއަށް ލިބިފައިވާ އިޚްތިޔާރެއް ކަމަށާއި ތަޙްޤީޤަށް ގޮންޖެހުންތައް ދިމާވި ކަމަށެވެ. ރައްދުވި ފަރާތުން ބުނީ ވީޑިއޯ ރިޕޯޓު ނެތިވެސް ދަޢުވާކުރެވޭނެ ކަމަށާއި ފުލުހުން ގަސްދުގައި ތަޙްޤީޤު ލަސްކުރި ކަމަށެވެ.

ޕްރޮސިކިއުޓަރ ޖެނެރަލް ތަޙްޤީޤުގެ މުއްދަތު އިތުރުކުރުމަށްފަހު، އެ އިތުރުކުރި މުއްދަތުގެ ތެރޭގައި ކުރި ދަޢުވާއަކީ ޤާނޫނު ނަންބަރު 17/2010 ގެ 17 ވަނަ މާއްދާގެ މުއްދަތު ފާއިތުވީފަހުން ކުރި ދަޢުވާއެއްތޯ.

ދަށުކޯޓުގެ ނިންމުން ބާޠިލު، މައްސަލަ އޮތް ހިސާބުން ކުރިއަށް ގެންދިއުމަށް ދަށުކޯޓަށް ފޮނުވި

ތަޙްޤީޤު ފުރިހަމަނުވާތީ މުއްދަތު އިތުރުކޮށް، އިތުރުކުރި މުއްދަތުގެ ތެރޭގައި ބޭކާރު ލަސްވުމެއް ނެތި ދަޢުވާކޮށްފައިވާތީ، ދަޢުވާ ކުރީ މުއްދަތު ފާއިތުވީފަހުން ކަމަށް ނުބެލެވޭނެކަމަށް ކޯޓުން ކަނޑައެޅިއެވެ.