ޕްރޮސިކިއުޓަރ ޖެނެރަލް ވ. މުޙައްމަދު ޢުބާދަތު ޙުސައިން

ކްރިމިނަލް ކޯޓުން (145-J/MA/2019/284، 21 ފެބްރުއަރީ 2019) ފުލުހުން 7 ދުވަހަށް ބަންދަށް އެދުނު ނަމަވެސް، ހޯދުނު ތަކެތީގައި ހުރި ފިންގަޕްރިންޓާ ބެހޭ ބަޔާނާއި ތަކެތި ހުރި ތަނާ ސީދާ ގުޅުވާލާނެ ހެކި ނުލިބޭތީ ބަންދުގައި ބަހައްޓަންޖެހޭ ސަބަބެއް ނެތްކަމަށް ބުނެ ޝަރުޠުކޮށް ދޫކޮށްލިއެވެ.

ތުހުމަތުކުރެވޭ ފަރާތް، އިތުރު ބަޔަކާ ގުޅިގެން މަސްތުވާތަކެތި ބޭނުންކޮށް، ގެންގުޅެ، އެތަކެތީގެ ވިޔަފާރިކުރާކަމަށް ތުހުމަތުކުރެވި ބަންދުގައި ހުއްޓެވެ.

ޕްރޮސިކިއުޓަރ ޖެނެރަލް ބުނީ އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 22(ޅ)، 59 އަދި 60 ވަނަ މާއްދާއާ ޚިލާފު، އެ ޤާނޫނުގެ 63 ވަނަ މާއްދާއަށް ރިޢާޔަތްނުކޮށް، އަދި ޤާނޫނުއަސާސީގެ 143(ރ) ގެ ދަށުން މަތީ ކޯޓުތަކުގެ ނިންމުންތަކަށް ތަބާނުވެ ނެރުނު އަމުރެއް ކަމަށެވެ.

މަސްތުވާތަކެތި ބޭނުންކޮށް، ގެންގުޅެ، ޓްރެފިކްކުރުމުގެ ތުހުމަތުގައި ބަންދުގައި ހުރި ފަރާތެއް ޝަރުޠުކޮށް ބަންދުން ދޫކޮށްލުމަށް ކްރިމިނަލް ކޯޓުން ނެރުނު އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 59 އާއި 60 ވަނަ މާއްދާއާ އެއްގޮތްވާ އަމުރެއްތޯ؛ އަދި މައްސަލަ ޝަރީޢަތަށް ހުށަހެޅިފައިވާއިރު ބަންދާމެދު ނިންމަންވީ ކޮން ކޯޓަކުންތޯ.

ދަށުކޯޓުގެ އަމުރު ބާޠިލު؛ ބަންދާމެދު އަލުން ނިންމުމަށް ދަށުކޯޓަށް ކަނޑައެޅި

ކުށަކީ ޖިނާއީ ބޮޑު ކުށަކަށްވުމާއި، ތުހުމަތު އުފެދޭ މިންވަރަށް ހެކި ޤަރީނާ ހުށަހެޅިފައިވާތީ، ތުހުމަތުކުރެވޭ ފަރާތް ދޫވެފައި ހުރުމަކީ މުޖުތަމަޢަށް ނުރައްކަލެއް ކަމަށް ބަލަންޖެހޭތީ ދޫކޮށްލުމުގެ އަމުރަށް ބަދަލު ގެނައުން ލާޒިމުވެއެވެ. ނަމަވެސް މައްސަލަ ކްރިމިނަލް ކޯޓަށް ޝަރީޢަތަށް ހުށަހެޅިފައިވާތީ ބަންދާމެދު ނިންމަންވީ މައްސަލަ ބަލާ ފަނޑިޔާރެވެ.