ޕްރޮސިކިއުޓަރ ޖެނެރަލް ވ. މުޙައްމަދު ސާލިމް

މަޑުއްވަރީ މެޖިސްޓްރޭޓް ކޯޓުން، ތުހުމަތުކުރެވޭ ފަރާތެއް ނެގި އިޖުރާއީ ނުކުތާތަކަށް ބިނާކޮށް، ވަގަށްނެގި ތަކެތީގެ ތަފްޞީލް ނެތުމާއި ކުށަށް ދީފައިނުވާ ނަމެއް ބޭނުންކުރުމުގެ ސަބަބުން ދަޢުވާ ބާޠިލު ދަޢުވާއެއްކަމަށް ކަނޑައެޅިއެވެ.

ތިން މީހުން އިތުރު ބަޔަކާއެކު ރިސޯޓެއްގެ ޕިކްނިކް ރަށެއްގެ ސްޓޯރރޫމުން ގިނަ ޢަދަދެއްގެ ސާމާނު ވަގަށް ނެގިކަމަށް ބުނެ، ޤާނޫނުލްޢުޤޫބާތުގެ 211 ވަނަ މާއްދާގެ (ހ) އާ ޙަވާލާދީ ވައްކަންކުރުމުގެ ކުށުގެ ދަޢުވާ ދައުލަތުން ކުރިއެވެ.

ޕްރޮސިކިއުޓަރ ޖެނެރަލް ބުނީ، ދަށުކޯޓުގެ ނިންމުމަކީ ޤާނޫނުއަސާސީގެ 223 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 82 ވަނަ މާއްދާގެ (ރ) އާއި 85 ވަނަ މާއްދާއާ ޚިލާފު ނިންމުމެއްކަމަށެވެ. ތުހުމަތުކުރެވޭ ފަރާތުން ބުނީ "ވައްކަންކުރުން" އަކީ މާއްދާގެ ސުރުޚީއެއް ކަމުން ޤާނޫނުގެ ބައެއް ނޫންކަމަށެވެ.

ޤާނޫނުލްޢުޤޫބާތުގެ 211 ވަނަ މާއްދާގެ (ހ) އާ ޙަވާލާދީ "ވައްކަންކުރުމުގެ ކުށް" ކަމަށް ކުރި ދަޢުވާއަކީ ކުށަށް ދީފައިނުވާ ނަމެއް ބޭނުންކޮށްގެން ކުރި ދަޢުވާއެއްތޯ، އަދި ވަގަށްނެގި ތަކެތީގެ ތަފްޞީލް ދަޢުވާގައި ނެތުމުން، ދަޢުވާ އިޞްލާޙުކުރުމުގެ ފުރުޞަތު ނުދީ ދަޢުވާ ބާޠިލުކުރުމަކީ ޖިނާއީ އިޖުރާއަތުގެ ޤާނޫނުގެ 82 އާއި 85 ވަނަ މާއްދާއާ އެއްގޮތްވާ ނިންމުމެއްތޯ.

ދަށުކޯޓުގެ ޙުކުމް ބާޠިލު

"ވައްކަންކުރުން" އަކީ ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 211 ވަނަ މާއްދާގެ ކުށަށް ދީފައިވާ ޚާއްޞަ ނަމެވެ. ތަކެތީގެ ތަފްޞީލް ނެތުމަކީ ޕްރޮސިކިއުޓަރ ޖެނެރަލްއަށް އިޞްލާޙުކުރެވޭނެ ކަމެއް ކަމަށާއި، އޭގެ ސަބަބުން ދަޢުވާ ލިބޭ ފަރާތަށް ދަޢުވާ އޮޅިދާނެ ޙާލަތެއް ނެތުމުން، ފުރުޞަތު ނުދީ ދަޢުވާ ބާޠިލުކުރުމަކީ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 85 ވަނަ މާއްދާއާއި ޕްރޮސިކިއުޓްކުރުމުގެ އިޖުރާއަތުގެ ގަވާއިދުގެ 24 ވަނަ މާއްދާއާ ޚިލާފު ނިންމުމެކެވެ.