އަޙްމަދު ތިހާމް ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ތިން މީހުންގެ މައްޗަށް ޤާނޫނު ނަންބަރު 9/2014 (ދިވެހިރާއްޖޭގެ ޤާނޫނުލްޢުޤޫބާތު) ގެ 530 ވަނަ މާއްދާގެ (ހ) ގެ (2) ގެ ދަށުން ކުށް ސާބިތުކޮށް، އިސްތިއުނާފުކުރި ފަރާތް 4 މަހާއި 24 ދުވަހަށް ޖަލަށްލުމަށް ޙުކުމްކުރިއެވެ.

28 ސެޕްޓެމްބަރު 2015 ގައި ރިޔާސީ ލޯންޗު "ފިނިފެންމާ" ގައި އެއްޗެއް ގޮވުމުން، އީ.އޯ.ޑީ ޓީމުގެ ފަސްޓް ލެފްޓިނެންޓެއް ކަމަށްވާ އިސްތިއުނާފުކުރި ފަރާތް ކާނަލް އަޙްމަދު ފަޔާޟް ޢަލީ ރިޟާގެ އެންގުމަށް ލޯންޗަށް އަރައި، ވަސީލަތްތައް ބޭނުންނުކޮށް ކުށުގެ ވެށިން ސާމްޕަލް ނަގައި ޓެސްޓުކުރުމަށް ހުޅުލެއަށް ގެންދިޔަކަމަށް ބުނެ ދަޢުވާ ކުރެވުނެވެ.

އިސްތިއުނާފުކުރި ފަރާތުން ބުނީ 530 (ހ)(2) ގެ ކޮން ޢަމަލެއްކަން ބަޔާންކޮށްފައި ނުވާކަމަށާއި، ފަނޑިޔާރުގެ އިސްނެގުމަށް ހެކިން ހާޟިރުކުރުމަކީ 2011/SC-A/34 އާ ޚިލާފުކަމަށާއި، ޚަބީރުގެ ހެކިބަހަށް ރިޢާޔަތް ނުކުރާކަމަށާއި، ހެކި ވަޒަންކުރުން 51 (އ) އާއި 2011/SC-A/36 އާ ޚިލާފުކަމަށެވެ.

ރިޔާސީ ލޯންޗުގައި ގޮވުމަކާ ގުޅިގެން، އީ.އޯ.ޑީ ޓީމުގެ ސިފައިންގެ މީހަކު ތަޙްޤީޤީ އިދާރާއަކާ ނުގުޅައި ކުށުގެ ވެށިން ސާމްޕަލް ނަގައި ގެންދިއުމަކީ ޤާނޫނުލްޢުޤޫބާތުގެ 530 ވަނަ މާއްދާގެ (ހ) ގެ (2) ގެ ދަށުން ޢަދުލު އިންސާފު ޤާއިމުކުރުމަށް ހުރަސްއެޅުމުގެ ކުށް ކަމަށް ސާބިތުވޭތޯއާއި، ދަޢުވާގެ ސީޣާ، ފަނޑިޔާރުގެ އިސްނެގުމުން ހެކިން ހާޟިރުކުރުން، ހެކި ވަޒަންކުރުމާއި ސުޕީރިއަރ އޯޑަރގެ ދިފާޢު.

އަޣުލަބިއްޔަތުން އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އަޣުލަބިއްޔަތުން ކަނޑައެޅީ ސާމްޕަލް ކުށުގެ ވެށިން ގެންދިއުމަކީ ހެކި ބަދަލުކުރުންކަމާއި، ދަޢުވާގެ ތަފްޞީލު ޕްރޮސިކިއުޝަނުން ސާފުކޮށްދީފައިވާކަމާއި، ފަނޑިޔާރުގެ އިސްނެގުމުން ހެކިން ހާޟިރުކުރުން ހުއްދަކަމާއި، ސުޕީރިއަރ އޯޑަރގެ ދިފާޢު ބަޔާންކޮށްދެވިފައި ނުވާކަމެވެ. ޚިލާފު ރައުޔުގައި (ފަނޑިޔާރު ޝުޢައިބު ޙުސައިން ޒަކަރިއްޔާ) ވެރިންގެ އަމުރަށް، ލިޔެވިފައިވާ އުޞޫލަކާ ޚިލާފުނުވާގޮތަށް ޢަމަލުކުރި ސިފައިންގެ މީހެއްގެ މައްޗަށް ހުރަސްއެޅުމުގެ މަޤްޞަދު ޝައްކެއްނެތް މިންވަރަށް ސާބިތު ނުވާތީ (ޤާނޫނުލްޢުޤޫބާތުގެ 15، 24 ވަނަ މާއްދާ، ސިފައިންގެ ޤާނޫނުގެ 8، 16 ވަނަ މާއްދާ، 2016/HC-A/568) ކުށް ސާބިތުކުރި ބައި ބާޠިލުކުރަންޖެހޭ ކަމަށް ދެކެވުނެވެ.