ޙުސައިން ސިމާދު ވ. ޕްރޮސިކިއުޓަރ ޖެނެރަލް

ހުޅުމާލެ މެޖިސްޓްރޭޓް ކޯޓުން ނިންމީ ދަޢުވާގެ ކުށާއި މާއްދާ ސާފުކަމުން މައްސަލަ މައުޟޫޢީ ގޮތުން ކުރިއަށް ގެންދެވޭނެ ކަމަށާއި، ތަޙުލީލު ރިޕޯޓަށް ބުރަދަނެއް ދިނުމާ މެދު ހެކިބަސް ނެގުމުގެ މަރުޙަލާގައި ގޮތެއް ނިންމުމަށެވެ.

ހުޅުމާލޭގައި ފުލުހުންނަށް ފެނުމުން ފިލަން އުޅުނު ތުހުމަތުކުރެވޭ ފަރާތް އެއްލައިލި ފުޅީގައި ހުރި ދިޔާތަކެތި ބަނގުރާއަށް ޕޮޒިޓިވްވުމުން، ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދަޢުވާ ޤާނޫނުލްޢުޤޫބާތުގެ 613 (ށ) ގެ ދަށުން ކުރެވުނެވެ. ދަޢުވާއަށް އިންކާރުކޮށް ޝަރީޢަތުގެ ކުރިން 6 ހުށަހެޅުމެއް ހުށަހެޅިއެވެ.

އިސްތިއުނާފުކުރި ފަރާތުން ބުނީ ހުއްދަ ނަގަންޖެހޭ އިދާރާ ސާފުނުކުރުމާއި، 2017/HC-A/352 ގެ އުޞޫލާ ޚިލާފުވުމާއި، ޙައްދުގެ އަދަބަށްވުރެ ތަޢުޒީރީ އަދަބު ބޮޑުވުމާއި، ތަޙުލީލު ރިޕޯޓު އިޖްރާއަތާ ޚިލާފުވުމާއި، ހުށަހެޅުންތަކާ މެދު ސަބަބު ބަޔާންނުކުރުމެވެ. ދައުލަތުން ބުނީ ގަވާއިދުގެ ދަށުން ހުއްދަ ނެތް މީހަކު ބަނގުރާ ގެންގުޅުން މަނާކަމާއި، ދަޢުވާކުރާ ކުށް ކަނޑައެޅުމުގެ ބާރު ޕީޖީއަށް ލިބިގެންވާކަމާއި، 2017/HC-A/352 ތަފާތު ކަމެވެ.

ހުއްދަ ނަގައިގެން ކުރަންޖެހޭ ކަމެއް ހުއްދަ ނުނަގައި ކުރުމުގެ ކުށުގެ ދަޢުވާގައި (ބަނގުރާ ގެންގުޅުން)، ޝަރީޢަތުގެ ކުރިން ހުށަހެޅި ހުށަހެޅުންތައް ބަލައިނުގަނެ މައްސަލަ މައުޟޫޢީ ގޮތުން ކުރިއަށް ގެންދިއުމަށް ހުޅުމާލެ މެޖިސްޓްރޭޓް ކޯޓުން ނިންމި ނިންމުން ޝަރުޢީ އަދި ޤާނޫނީ ހަމަތަކާ އެއްގޮތްތޯ؛ ހަމައެއާއެކު، ބަނގުރާ ބުއިމުގެ ކުށަށް ދަޢުވާ ނުކޮށް ޤާނޫނުލްޢުޤޫބާތުގެ 613 ވަނަ މާއްދާގެ ދަށުން ދަޢުވާކުރެވޭތޯއާއި، ތަޙުލީލު ރިޕޯޓާ މެދު ނިންމުމާއި ހުށަހެޅުންތަކާ މެދު ސަބަބު ބަޔާންނުކުރުން ރަނގަޅުތޯ.

ދަށުކޯޓުގެ ނިންމުމަށް ބަދަލެއް ނުގެނެވުނު (އަޣުލަބިއްޔަތުން)

ދެ ކުށަކީ ވަކި ކުށްތަކެއް ކަމުން ހެކި ލިބުނު ކުށަށް ދަޢުވާކުރުމަކީ ޕީޖީގެ އިޚްތިޔާރެއް ކަމާއި، ހުއްދަ އޮތްކަން ސާބިތުކުރަންޖެހެނީ ތުހުމަތުކުރެވޭ ފަރާތުން ކަމާއި، މައްސަލަ ކުރިއަށް ގެންދާ ކަމަށް ނިންމާއިރު ކޮންމެ ހުށަހެޅުމަކާ މެދު ތަފްސީލު ސަބަބު ބަޔާންކުރަން ނުޖެހޭ ކަމާއި، ހެއްކަށް ދޭ ބުރަދަން ހެކިބަސް ނެގުމުގެ މަރުޙަލާގައި ކަނޑައެޅިދާނެ ކަމެވެ. ފަނޑިޔާރު ޙުސައިން ޝަހީދުގެ ރައުޔުގައި ބުނީ ތަޙުލީލު ރިޕޯޓާއި އެހެން ހުށަހެޅުންތަކާ މެދު ސާފު ނިންމުމެއް ނިންމަން އަންގަންޖެހޭ ކަމަށެވެ.