ޕްރޮސިކިއުޓަރ ޖެނެރަލް ވ. މުޙައްމަދު ރިޔާޟް

ކްރިމިނަލް ކޯޓުން، 2 އަހަރަށްވުރެ ގިނަ ދުވަސް ބަންދުގައި ހުރުމާއި ރިމާންޑް ޖަލެއްގައި ނުބެހެއްޓުމާއި ކުށުގެ ރެކޯޑާއި މައްސަލައާ ގުޅުމަށް ބަލައި، މާލެ ސަރަޙައްދުން ބޭރަށް ނުދިއުން ފަދަ 4 ޝަރުޠާއެކު ދޫކޮށްލުމަށް އަމުރުކުރިއެވެ.

ޖަދުވަލު 1 ގައިވާ މަސްތުވާތަކެތި ރާއްޖެއަށް އެތެރެކުރުމުގެ ތުހުމަތުގައި ޝަރީޢަތް ނިމެންދެން ބަންދުގައި 2 އަހަރަށްވުރެ ގިނަ ދުވަސް ހުރި ތުހުމަތުކުރެވޭ ފަރާތް، މައްސަލަ އަދިވެސް އިބްތިދާއީ އަޑުއެހުމުގެ މަރުޙަލާގައި ހުއްޓައެވެ.

ޕްރޮސިކިއުޓަރ ޖެނެރަލުން ބުނީ އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 22(ޅ)، 59، 60 އާއި، މަތީ ކޯޓުތަކުގެ ނިންމުންތަކަށް ތަބާވުމާ ބެހޭ ޤާނޫނުއަސާސީގެ 143(ރ) އާ ޚިލާފު އަމުރެއްކަމަށެވެ.

ޖަދުވަލު 1 ގައިވާ މަސްތުވާތަކެތި ރާއްޖެއަށް އެތެރެކުރުމުގެ ތުހުމަތުގައި 2 އަހަރަށްވުރެ ގިނަ ދުވަސް ޝަރީޢަތް ނިމެންދެން ބަންދުގައި ހުރި ތުހުމަތުކުރެވޭ ފަރާތެއް ޝަރުޠުތަކާއެކު ދޫކޮށްލުމަށް ކްރިމިނަލް ކޯޓުން ނެރުނު އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 59، 60 ވަނަ މާއްދާއާ ޚިލާފު އަމުރެއްތޯ.

އިސްތިއުނާފު ބާޠިލް، ދަށުކޯޓުގެ އަމުރު ޤާއިމް

ކްރިމިނަލް ކޯޓުން ބަންދުގައި ހުރި މުއްދަތާއި ގުޅުންހުރި ކަންކަމަށް ރިޢާޔަތްކޮށް، ސަބަބު ސާފުކޮށް ބަޔާންކޮށް، ފިލައިގެން ނުދާނެކަމާއި ނުފޫޒު ނުފޯރުވާނެކަން ކަށަވަރުކުރާ ޝަރުޠުތަކާއެކު ދޫކޮށްލާފައިވާތީ ޢަދުލުއިންޞާފާ ޚިލާފު ނިންމުމެއް ނޫނެވެ.