ޕްރޮސިކިއުޓަރ ޖެނެރަލް ވ. އިބްރާހީމް ފައިޙް ނިޡާމު

ތަޙްޤީޤު 8 މަހަށްވުރެ ދިގުލައިފައިވާތީ ވަކި މުއްދަތެއް ނެތި ބަންދުކުރުމަކީ އިންޞާފުވެރި ގޮތެއް ނޫންކަމަށް ބުނެ، ޤާނޫނު ނަންބަރު 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 17 ވަނަ މާއްދާއަށް ރިޢާޔަތްކޮށް 45 ދުވަހަށް ބަންދުކުރުމަށް ކްރިމިނަލް ކޯޓުން އަމުރުކުރިއެވެ.

ފިހާރައެއްގެ ތެރޭގައި މީހަކަށް ތޫނު ހަތިޔާރުން ހަމަލާދީ މަރާލި ހާދިސާއަކާ ގުޅިގެން 06 ނޮވެންބަރު 2023 ގައި ތުހުމަތުކުރެވޭ ފަރާތް ހައްޔަރުކޮށް، ޝަރީޢަތް ނިމެންދެން ބަންދުކުރުމަށް ފުލުހުން އެދުނެވެ.

ދައުލަތުން ބުނީ ޤާނޫނު ނަންބަރު 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 16 ވަނަ މާއްދާގެ ޓެސްޓް ފުރިހަމަވާނަމަ ނަތީޖާއަކީ ޝަރީޢަތް ނިމެންދެން ބަންދުކުރުން ކަމަށެވެ. ރައްދުވި ފަރާތުން ބުނީ ޤާނޫނީ އިންޒާރުގައި ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 12 ވަނަ މާއްދާ ބަޔާންކޮށްފައި ނުވާކަމަށާއި، ދޫކޮށްލުމަށްފަހު ހަމަ އެދުވަހު އަލުން ހައްޔަރުކުރުމަށް ސަބަބެއް ނެތްކަމަށެވެ.

ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ 16 ވަނަ މާއްދާގެ ޝަރުޠުތައް ފުރިހަމަވާ ފަރާތެއް، ޝަރީޢަތް ނިމެންދެން ބަންދުކުރުމުގެ ބަދަލުގައި އެ ޤާނޫނުގެ 17 ވަނަ މާއްދާއަށް ރިޢާޔަތްކޮށް 45 ދުވަހަށް ބަންދުކުރުމަށް ކަނޑައެޅިދާނެތޯ.

ދަށުކޯޓުގެ ބަންދުގެ އަމުރު ބާޠިލު

ޤާނޫނު ނަންބަރު 17/2010 (ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު) ގެ 16 ވަނަ މާއްދާގެ ދެ ޝަރުޠު ފުރިހަމަވާނަމަ ޝަރީޢަތް ނިމެންދެން ބަންދުކުރުން ނޫން އިޚްތިޔާރެއް ނެތުމާއި، 17 ވަނަ މާއްދާއަކީ ބަންދުގެ މުއްދަތު ކަނޑައަޅާ މާއްދާއެއް ނޫންކަމަށް ކޯޓުން ކަނޑައެޅިއެވެ.