ޕްރޮސިކިއުޓަރ ޖެނެރަލް ވ. ޙަސަން ރިސްފާޙް

ދައުލަތުގެ ދެ ހެކިވެރިންގެ ހެކިބަހުގައި ތަފާތުތައް ހުރީމާ ދަޢުވާ އެކަށީގެންވާ ޝައްކެއްނެތް މިންވަރަށް ސާބިތުނުވާކަމަށް ހިރިމަރަދޫ މެޖިސްޓްރޭޓް ކޯޓުން ނިންމިއެވެ.

ތުހުމަތުކުރެވޭ ފަރާތުގެ ޖީބުން ފެނުނު ސިނގިރޭޓް ފޮއްޓެއްގެ ތެރެއިން 6 ސެލޯފިން ކޮޅުގައި 0.4964 ގްރާމް ކެނެބިސް ފެނުނުކަމަށް ބުނެ މަސްތުވާ ތަކެއްޗާބެހޭ ޤާނޫނުގެ 110 ވަނަ މާއްދާގެ ދަށުން ކެނެބިހުން މުޢާމަލާތްކުރުމުގެ ދަޢުވާ ކުރިއެވެ.

ޕީޖީ އޮފީހުން ބުނީ ހެކިބަސް ލިބިފައިވީނަމަވެސް ސާބިތުނުވާކަމަށް ނިންމުން ޤާނޫނުއަސާސީގެ 51 (އ) އާ ޚިލާފު ކަމަށާއި، ޚުލާޞާ ބަޔާނާއި ޙުކުމްކުރުމުގެ އިޖުރާއަތު ޖިނާއީ އިޖުރާއަތުގެ ޤާނޫނުގެ 150، 151 އާއި ޤަވާޢިދުގެ 127 ވަނަ މާއްދާއާ ޚިލާފު ކަމަށެވެ.

ކެނެބިހުން މުޢާމަލާތްކުރުމުގެ ދަޢުވާ ފުލުހުންގެ ހެކިބަހުގައި ހުރި ފުށުއެރުންތަކުގެ ސަބަބުން އެކަށީގެންވާ ޝައްކެއްނެތް މިންވަރަށް ސާބިތުނުވާކަމަށް މެޖިސްޓްރޭޓް ކޯޓުން ނިންމުން ރަނގަޅުތޯ؛ އަދި ޚުލާޞާ ބަޔާނާއި ޙުކުމްކުރުމުގެ އިޖުރާއަތު ޖިނާއީ އިޖުރާއަތުގެ ޤާނޫނާ ޚިލާފުތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދެ ފުލުހުންގެ ހެކިބަހާއި ތަޙުޤީޤު ބަޔާންތަކުގައި ފުށުއެރުންތައް ހުރުމާއި، ހެކިވެރިޔާއަށް ތުހުމަތުކުރެވޭ ފަރާތް ދެނެނުގަނެވުމުން އެކަށީގެންވާ ޝައްކު އުފެދޭތީ ނިންމުން ރަނގަޅެވެ؛ ޙުކުމްކުރުމުގެ ކުރިން ދައުލަތަށް ޚުލާޞާ ބަޔާނުގެ ފުރުޞަތު ދީފައިވާތީ އިޖުރާއީ ނުކުތާ ބާޠިލެވެ.