ޕްރޮސިކިއުޓަރ ޖެނެރަލް ވ. ޢަލީ ޝަފީޤު

ކްރިމިނަލް ކޯޓުން، ދަތުރުފަތުރުގެ މިނިވަންކަމުގެ ދަށުން ކުރި ދަތުރެއް ކަމަށާއި ޤާނޫނުލްޢުޤޫބާތުގެ ދަށުން ހުށަހެޅި ދިފާޢު މަދަނީ މިންގަނޑަށް ސާބިތުވާތީ، ދަޢުވާ ކުރިއަށް ނުގެންދެވޭނެ ކަމަށް ކަނޑައަޅައި ދަޢުވާ ބާޠިލުކުރިއެވެ.

ދުބާއީއަށް ޗުއްޓީއަށް ދިޔަ ކަމަށް ބުނެ ތުރުކީއަށް ދަތުރުކޮށް، ސީރިއާގެ ހަނގުރާމައިގައި ބައިވެރިވުމަށް ސީރިއާއަށް ދިއުމަށް މަސައްކަތްކުރި ކަމަށް ބުނެ ޓެރަރިޒަމް މަނާކުރުމުގެ ޤާނޫނުގެ ދަށުން ދަޢުވާ ކުރެވުނެވެ.

ދައުލަތުން ބުނީ ނިންމުމަކީ ޖިނާއީ އިޖުރާއަތުގެ ޤާނޫނާއި ހައިކޯޓުގެ ކުރީގެ ނިންމުމަކާ ޚިލާފު ނިންމުމެއް ކަމަށާއި، މަތީ ކޯޓުތަކުގެ ނިންމުންތަކަށް ތަބާވާންޖެހޭ ޤާނޫނުއަސާސީގެ އުޞޫލާ ޚިލާފު ކަމަށެވެ. ދަޢުވާ ލިބޭ ފަރާތުގެ ޖަވާބު ބިނާވެފައިވަނީ ދައުލަތުގެ ހެކި ޠަޢުނުކުރުމުގެ މައްޗަށެވެ.

އިބްތިދާއީ އަޑުއެހުމުގައި ދަޢުވާ ލިބޭ ފަރާތުން ޤާނޫނުލްޢުޤޫބާތުގެ ދަށުން ހުށަހެޅި ދިފާޢަކަށް ބިނާކޮށް، ހެކި ވަޒަންކޮށް، ޓެރަރިޒަމްގެ ދަޢުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ކަނޑައެޅުމަކީ ޖިނާއީ އިޖުރާއަތުގެ ޤާނޫނާ އެއްގޮތަށް ކުރެވުނު ނިންމުމެއްތޯ.

ދަށުކޯޓުގެ ނިންމުން ބާޠިލު، މައުޟޫޢީ ގޮތުން ބެލުމަށް ކްރިމިނަލް ކޯޓަށް ތަޙްވީލުކުރި

ހުށަހެޅުނު ދިފާޢަކީ ދަޢުވާ ކުރުމަށް ހުރަހެއްގެ ދިފާޢެއް ނޫން ކަމުން އޭގެ ދަށުން ދަޢުވާ ބާޠިލުކުރުމަކީ ރަނގަޅު ނިންމުމެއް ނޫނެވެ. ދައުލަތުގެ ހެކިތަކަށް މަދަނީ މިންގަނޑުން ބަލާއިރު ތުހުމަތުކުރެވޭ ޢަމަލު ހިންގުން ގާތްކަމުން ދަޢުވާ މައުޟޫޢީ ގޮތުން ބަލަންޖެހެއެވެ.