ޕްރޮސިކިއުޓަރ ޖެނެރަލް ވ. ޢަބްދުލްޖަލީލް ޙުސައިން މަނިކު

އޭދަފުށީ މެޖިސްޓްރޭޓް ކޯޓުން، ސައިކިއޭޓްރިކް އެސެސްމަންޓުން ތުހުމަތުކުރެވޭ ފަރާތަކީ ބައިޕޯލާ ބައްޔެއް ހުރި މީހެއްކަން އެނގޭތީ، ދަޢުވާ ބަލައިގަތުމަށާއި ޙުކުމް ބަލައިގަތުމަށް ނުކުޅެދޭ މީހެއްކަމަށް ކަނޑައަޅައި ދަޢުވާ ބާޠިލުކުރިއެވެ.

ބ. ރިސޯޓެއްގެ ފަޅުތެރޭގައި ލައިސަންސް ނެތި ޑިންގީއެއް ބާރު ސްޕީޑްގައި ދުއްވައިގެން ސްނޯކްލް ކުރަމުންދިޔަ ފަތުރުވެރިންގެ ގައިގައި ޖެހި އެކަކު ނިޔާވުމުން، މީހަކު މަރުވެދިއުމުގެ ފަރުވާކުޑަ ޢަމަލެއް ކުރުމުގެ ދަޢުވާ ދައުލަތުން އުފުލިއެވެ.

ދައުލަތުން ބުނީ ޖިނާއީ އިޖުރާއަތުގެ ޤާނޫނުގެ 121 އާއި ޤާނޫނުލްޢުޤޫބާތުގެ 62 އަށް ރިޢާޔަތްނުކޮށް، ކޯޓުން އަމުރުކުރި މެޑިކަލް އެގްޒަމިނޭޝަން ނުހަދައި، ޚަބީރުގެ ހެކިބަސް ނުނަގައި ނިންމި ކަމަށެވެ؛ ތުހުމަތުކުރެވޭ ފަރާތުން އެދުނީ އިޖުރާއަތު ފުރިހަމަކޮށް ރިޕޯޓެއް ހެދުމުގެ ފުރުޞަތު ދިނުމަށެވެ.

ތުހުމަތުކުރެވޭ ފަރާތް ޝަރީޢަތުގެ ކުރިން ހުށަހަޅަންޖެހޭ ހުށަހެޅުމެއްގެ ގޮތުގައި 'ދަޢުވާ ބަލައިގަތުމާއި ޙުކުމް ބަލައިގަތުމަށް ނުކުޅެދުމުގެ' ދިފާޢު ނަގާފައި ނުވަނިކޮށް، ބުއްދިއަށް އުނިކަން ލިބިގެންވުމުގެ ހެކި އަލީގައި ދަޢުވާ ބާޠިލުކުރުމަކީ ޤާނޫނާ އެއްގޮތް ނިންމުމެއްތޯ؛ މި ދެ ދިފާޢުގެ ތަފާތަކީ ކޮބައިތޯ.

ދަށުކޯޓުގެ ނިންމުން ބާޠިލު، ޝަރީޢަތުގެ މަރުޙަލާއިން ފެށިގެން އަލުން ބެލުމަށް ފޮނުވި

ދަޢުވާ ބަލައިގަތުމަށް ނުކުޅެދުމުގެ ދިފާޢު ޝަރީޢަތުގެ ކުރިން ނަގާފައި ނުވާއިރު، އޭނާ ދަޢުވާއަށް ޖަވާބުދީ ހެކި ހުށަހަޅާފައިވާތީ އެ ދިފާޢުގެ މައްޗަށް ނިންމުން ރަނގަޅެއް ނޫނެވެ؛ ހުށަހެޅި ހެކި ގުޅެނީ ބުއްދިއަށް އުނިކަން ލިބިގެންވުމުގެ ދިފާޢާ ކަމަށްވާތީ ދަށުކޯޓުން އެ ދިފާޢު ވަޒަންކުރަން ޖެހެއެވެ.