ޕްރޮސިކިއުޓަރ ޖެނެރަލް ވ. ޙުސައިން ޝަހުދު

ތަޙްޤީޤީ މަރުޙަލާގައި ފުލުހުން ޖިނާއީ އިޖުރާއަތުގެ ޤާނޫނާ ޚިލާފަށް ޢަމަލުކުރާތީ ޖިނާއީ އިޖުރާއަތުގެ ޤާނޫނުގެ 120 ވަނަ މާއްދާގެ (ނ) އަށް ޙަވާލާދީ ދަޢުވާ ކުރިއަށް ނުގެންދެވޭނެކަމަށް ކަނޑައަޅައި ކްރިމިނަލް ކޯޓުން ދަޢުވާ ފޯމު ބާޠިލުކުރިއެވެ.

މަސްތުވާތަކެތީގެ ވިޔަފާރިކުރާކަމަށް ލިބުނު މަޢުލޫމާތާ ގުޅިގެން ހިފެހެއްޓިއިރު ފަޅުތެރެއަށް އެއްލާލި ސިނގިރޭޓު ފޮށީގައި ޑައިމޯފިން ހުރިކަމަށް ބުނެ ޑައިމޯފިން ޓްރެފިކްކުރުމުގެ ދަޢުވާކުރިއެވެ. ތުހުމަތުކުރެވޭ ފަރާތުން ޝަރީޢަތުގެ ކުރިން ހުށަހެޅީ ބިޑިއެޅުވީ ޤާނޫނާ ޚިލާފަށްކަމަށެވެ.

ދައުލަތުން ބުނީ ބިޑިއެޅުވުމާ ބެހޭ ދިފާޢަކީ ދަޢުވާކުރުމަށް ހުރަހަކަށް ވާ ދިފާޢެއް ނޫންކަމަށާއި ނިންމުން ޤާނޫނާ ޚިލާފުކަމަށެވެ. ރައްދުވާ ފަރާތުން ބުނީ ބިޑިއެޅުވީ ހައްޔަރުކުރުމުގެ ކުރިން ޤާނޫނާ ޚިލާފަށް ކަމަށާއި މައްސަލަ ތަޙްވީލުކޮށް ދަށުކޯޓުގައި އެކަން ބަލަންވާނެކަމަށެވެ. 120 (ނ) އަށް ޙަވާލާދީ ކުރި ނިންމުން ރަނގަޅު ނޫންކަމަށް ދެފަރާތުން އެއްބަސްވިއެވެ.

ހައްޔަރުކުރުމުގައި ޤާނޫނާ ޚިލާފަށް ބިޑިއެޅުވިކަމަށް ބުނެ ހުށަހެޅި ހުށަހެޅުމަކީ ޖިނާއީ އިޖުރާއަތުގެ ޤާނޫނުގެ 120 ވަނަ މާއްދާގެ (ނ) ގެ ދަށުން ދަޢުވާކުރުމަށް ހުރަހަކަށް ވެދާނެ ދިފާޢެއްތޯ، އަދި އެ މާއްދާގެ ދަށުން ޑައިމޯފިން ޓްރެފިކްކުރުމުގެ ދަޢުވާ ފޯމު ބާޠިލުކުރުން ޞައްޙަތޯ.

ދަށުކޯޓުގެ ޙުކުމް ބާޠިލު، ދަޢުވާ ކްރިމިނަލް ކޯޓަށް ތަޙްވީލުކުރި

ހުށަހެޅި ދިފާޢަކީ ޤާނޫނުލްޢުޤޫބާތުގެ 60 ވަނަ ބާބުގައިވާ ދަޢުވާކުރުމަށް ހުރަހަކަށް ވެދާނެ ދިފާޢެއް ނޫންކަމުން 120 (ނ) ގެ ދަށުން ދަޢުވާ ބާޠިލުކުރެވޭނެ ތަނެއް ނެތެވެ.