ޕްރޮސިކިއުޓަރ ޖެނެރަލް ވ. އަޙްމަދު ޝަމީމް

އިތުރަށް ބަންދުގައި ބަހައްޓަންޖެހޭ ސަބަބެއް ނުފެންނާތީ ޝަރުޠުތަކާއެކު ބަންދުން ދޫކުރުމަށް ފޮނަދޫ މެޖިސްޓްރޭޓް ކޯޓުން އަމުރުކުރިއެވެ.

ދަގަނޑު ބުރިއަކުން މީހެއްގެ ގައިގައި ޖަހައި އަނިޔާކުރި ކަމަށް ތުހުމަތުކުރެވޭ މީހަކު ހައްޔަރުކޮށް 7 ދުވަހަށް ބަންދުކުރުމަށްފަހު، މުޖުތަމަޢުގެ ސަލާމަތާއި ހެކިންނަށް ނުފޫޒު ފޯރުވުމުގެ ސަބަބުން ބަންދު އިތުރުކުރަން ފުލުހުން އެދުނެވެ.

ޤާނޫނުއަސާސީގެ 49 ވަނަ މާއްދާގެ ޙާލަތެއް އޮތްއިރު އެއަށް ރިޢާޔަތްނުކޮށް، ޖިނާއީ އިޖުރާއަތުގެ ޤާނޫނުގެ 59، 60 އާއި ސުޕްރީމް ކޯޓުގެ 2020/SC-A/93 އާ ޚިލާފަށް އަމުރު ނެރުނު ކަމަށް ޕްރޮސިކިއުޓަރ ޖެނެރަލް ބުންޏެވެ. ތުހުމަތަކީ ޖިނާއީ ބޮޑު ކުށެއް ނޫން ކަމަށާއި ހެކިތަކަށް ނުފޫޒު ފޯރުވޭނެ ޙާލަތެއް ނެތް ކަމަށް ތުހުމަތުކުރެވޭ ފަރާތުން ބުންޏެވެ.

ދަގަނޑު ބުރިއަކުން ޖަހައި އަނިޔާކުރި ކަމަށް ތުހުމަތުކުރެވޭ މީހަކު، ބަންދުގައި ބެހެއްޓަންޖެހޭ ސަބަބެއް ނުފެނޭ ކަމަށް ބުނެ ޝަރުޠުތަކާއެކު ދޫކޮށްލި މެޖިސްޓްރޭޓް ކޯޓުގެ އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 59 އާއި 60 ވަނަ މާއްދާ އަދި ސުޕްރީމް ކޯޓުގެ 2020/SC-A/93 ގައިވާ މިންގަނޑާ އެއްގޮތަށް ނެރުނު އަމުރެއްތޯ.

މެޖިސްޓްރޭޓް ކޯޓުގެ އަމުރު ބާޠިލު

ތުހުމަތަށް ބާރުދޭ ހެކި ހުރުމާއެކު، އަނިޔާވެރިކަން ހިމެނޭ ޢަމަލެއްގެ ބާވަތަށް ބަލާއިރު ދޫކޮށްލުމުން މުޖުތަމަޢުގެ ސަލާމަތަށް ނުރައްކާވެދާނެކަމަށް ބަލަންޖެހޭއިރު، ދަށުކޯޓުން ރިޢާޔަތްކުރަންޖެހޭ ކަންކަމަށް ރިޢާޔަތްކޮށްފައި ނުވާތީ އަމުރު ބާޠިލުކުރެވުނެވެ.