ޕްރޮސިކިއުޓަރ ޖެނެރަލް ވ. އަޙްމަދު ޢަބްދުއްރަޙްމާން

ކްރިމިނަލް ކޯޓުން ތަޙްޤީޤަށް އެއްބާރުލުން ދީފައިވާތީ، ކުށުގެ ރެކޯޑެއް ނެތުމުން، އަދި ތުހުމަތުކުރެވޭ ކުށަކީ ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 22 ވަނަ މާއްދާގައިވާ ޖިނާއީ ބޮޑު ކުށެއް ނޫންކަމަށް ބަލައި، ފުރުން މަނާކޮށް ބަންދުން ދޫކޮށްލުމަށް އަމުރުކުރިއެވެ.

ތުހުމަތުކުރެވޭ ފަރާތް އޮތް ބޯޓުން ފުލުހުން ގާތްގަނޑަކަށް 2 ކިލޯގެ ކެނަބިސް ފެނުމުން، ޖަދުވަލު 1 ގެ މަސްތުވާތަކެތި ދިވެހިރާއްޖެއަށް އެތެރެކުރުމުގެ ދަޢުވާ ކުރެވި، ޝަރީޢަތް ނިމެންދެން ބަންދުކުރުމަށް ދައުލަތުން އެދުނެވެ.

ޕްރޮސިކިއުޓަރ ޖެނެރަލް ބުނީ އަމުރަކީ ޤާނޫނުއަސާސީގެ 49 ވަނަ މާއްދާއާއި، މަސްތުވާތަކެއްޗާބެހޭ ޤާނޫނުގެ 138، 139، 144 ވަނަ މާއްދާތަކާއި، ޖިނާއީ އިޖުރާއަތުގެ ޤާނޫނުގެ 22، 59، 60، 63 ވަނަ މާއްދާތަކާއި، ޤާނޫނުއަސާސީގެ 143 (ރ) އާ ޚިލާފު އަމުރެއްކަމަށެވެ.

ޖަދުވަލު 1 ގެ މަސްތުވާތަކެތި ދިވެހިރާއްޖެއަށް އެތެރެކުރުމުގެ ދަޢުވާ ކުރެވިފައިވާ މީހަކު، އެއީ ޖިނާއީ ބޮޑު ކުށެއް ނޫންކަމަށް ބަލައި ފުރުން މަނާކޮށް ބަންދުން ދޫކޮށްލުމަށް ކްރިމިނަލް ކޯޓުން ނެރުނު އަމުރު ޖިނާއީ އިޖުރާއަތުގެ ޤާނޫނާއި މަސްތުވާތަކެއްޗާބެހޭ ޤާނޫނާ އެއްގޮތްތޯ.

ދަށުކޯޓުގެ އަމުރު ބާޠިލު؛ ޕްރޮސިކިއުޓަރ ޖެނެރަލް އަލުން ހުށަހަޅައިފިނަމަ މި ޙުކުމުގެ އަލީގައި ބަންދާމެދު ދަށުކޯޓުން ނިންމަން ޖެހޭ

މަސްތުވާތަކެތި އެތެރެކުރުމަކީ ޓްރެފިކްކުރުން ކަމުގައި ބެލެވޭ ޖިނާއީ ބޮޑު ކުށަކަށްވާތީ، އަދި ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 63 ވަނަ މާއްދާގެ ދަށުން ޝަރުޠުތަކާއެކު ދޫނުކުރެވޭ ކުށަކަށްވާތީ، 60 (ށ) (4) ގެ ސަބަބު ފެންނައިރު ޝަރުޠުކޮށް ދޫކޮށްލުމަކީ ޤާނޫނާ ޚިލާފު ކަމެކެވެ؛ ނަމަވެސް ބަންދާމެދު ފަހު ނިންމުން ނިންމާނީ ދަށުކޯޓުންނެވެ.