ޕްރޮސިކިއުޓަރ ޖެނެރަލް ވ. އަޙްމަދު ހަފީޡު

ބަނޑިދޫ މެޖިސްޓްރޭޓް ކޯޓުން، ކުށްތަކަކީ 7/2025 ގެ 33 ވަނަ މާއްދާގައި ތަޖްރީމްކޮށްފައިވާ ކުށްތަކެއްކަމަށާއި ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ޤާނޫނުގެ 58 ވަނަ މާއްދާގެ ދަށުން ބަންދުގެ ޝަރުޠުތައް ފުރިހަމަވާކަމަށް ބަލައި ޝަރީޢަތް ނިމެންދެން ބަންދު ދެމެހެއްޓިއެވެ. ހައިކޯޓުން، ބިޝާރު ޤަޟިއްޔާގެ އުޞޫލުން ބަންދު މުރާޖަޢާކުރުމުގައި ބަލަންވާނީ ޙާލަތަށް ބަދަލު އައިސްފައިވޭތޯ ކަމަށްވާއިރު، 7/2025 ގެ 58 ވަނަ މާއްދާގެ ދަށުން އައު ބަންދު އަމުރެއް ކުރުމަކީ އެ ޓެސްޓާ ޚިލާފުކަމަށް ބުނެ ދަށުކޯޓުގެ ނިންމުން ބާޠިލުކުރިއެވެ.

2024 އެޕްރީލްގައި އަޙްމަދު ހަފީޡު އަނބިމީހާއަށް ވަޅިން ބިރުދައްކައި މަރާލަން އުޅުނުކަމަށް ތުހުމަތުކޮށް، 17/2010 ގެ 16 ވަނަ މާއްދާގެ ދަށުން ޝަރީޢަތް ނިމެންދެން ބަންދުކުރިއެވެ. ބަންދުގައި ހުއްޓައި 17/2010 އުވި، 7/2025 (ގޭންގުތަކުން ހިންގާ ކުށްތަކާއި…ގެ ޤާނޫނު) އަށް ޢަމަލުކުރަން ފެށުމުން، ތުހުމަތުކުރި ކުށް އައު ޤާނޫނުގައި ތަޖްރީމްކޮށްފައި ނުވާކަމަށާއި 18 މަސް ބަންދުގައި ހޭދަވެއްޖެކަމަށް ބުނެ ބަންދު މުރާޖަޢާކުރަން އެދުނެވެ.

ދައުލަތުން ބުނީ ހައިކޯޓުގެ ނިންމުމަކީ ޤާނޫނުއަސާސީގެ 68، 143 (ރ)، މާނަކުރުމުގެ ޤާނޫނުގެ 19 އަދި ކޯޓުތަކުގެ ޤާނޫނުގެ 32 (ހ) އާ ޚިލާފު ނިންމުމެއް ކަމަށާއި، ޖިނާއީ އިޖުރާއާތުގައި ބަލާނީ އެ ވަގުތު ވުޖޫދުގައިވާ ޤާނޫނަށް ކަމަށާއި، ޢަމަލު 7/2025 ގެ 33 (ހ) (3) ގައި ތަޖްރީމްކޮށްފައިވާ ކަމަށެވެ.

ޝަރީޢަތް ނިމެންދެން ބަންދުކުރި ޤާނޫނު (17/2010) އުވި އައު ޤާނޫނަކަށް (7/2025) ޢަމަލުކުރަން ފެށުމުން، ބަންދު މުރާޖަޢާކުރުމުގައި އައު ޤާނޫނުގެ އިޖުރާއީ މާއްދާތަކަށް ރިޢާޔަތްކޮށް ދަށުކޯޓުން ބަންދު ދެމެހެއްޓުން ރަނގަޅުތޯ؛ އަދި ކުރީގެ ޤާނޫނުގެ ދަށުން ތުހުމަތުކުރި ޢަމަލު އައު ޤާނޫނުގައި ތަޖްރީމްކޮށްފައިނުވާނަމަ ބަންދަށް ކުރާ އަސަރު.

ހައިކޯޓުގެ ޙުކުމް ބާޠިލު، ބަންދު މުރާޖަޢާކޮށް ދަށުކޯޓުން ނިންމި ނިންމުން ޤާއިމް

މައުޟޫޢީ ގޮތުން ކުށާއި އަދަބު ކަނޑައަޅާނީ ކުރީގެ ޤާނޫނުން (ޤާނޫނުއަސާސީގެ 59 ވަނަ މާއްދާގެ ލުއި ފިޔަވައި)؛ ތުހުމަތުކުރި ޢަމަލު ފަހުގެ ޤާނޫނުންވެސް ތަޖްރީމްކޮށްފައިވާކަން މަތިމަތިން ބެލުމުން ފެނެއެވެ. ބަންދު މުރާޖަޢާކުރުމަކީ އިޖުރާއީ ކަމަކަށްވާތީ އައު ޤާނޫނުގެ އިޖުރާއާތަށް ވަގުތުން ތަންފީޒުވާއިރު އިސްތިސްނާ ޙާލަތެއް ނެތުމުން، ދަށުކޯޓުން 7/2025 ގެ މާއްދާތަކަށް ރިޢާޔަތްކުރުން ރަނގަޅެވެ.