މުޙައްމަދު ޝިފްރާޒް ވ. ޕްރޮސިކިއުޓަރ ޖެނެރަލް

ޖިނާއީ ކޯޓުން 2008 ޖުލައި 29 ގައި 4 މީހުން ޤަޞްދުގައި މީހަކު މަރާލުމުގެ ކުށުން ކުށްވެރިކޮށް، ޤާނޫނުލްޢުޤޫބާތުގެ 88 (ރ) ގެ ދަށުން މެރުމަށް ޙުކުމްކުރިއެވެ. އެ 4 މީހުންގެ ތެރެއިން ދެމީހެއްގެ ޙުކުމް ހައިކޯޓުގެ 2008/HC-A/295 އާއި 2015/HC-A/213 ޤަޟިއްޔާތަކުން ކުރިން ބާޠިލުކޮށްފައިވެއެވެ.

2006 ވަނަ އަހަރު 4 މީހުން ގެއަކަށް ވަދެ މީހަކަށް ލަކުޑިފަތިބުރިތަކުންނާއި އަތުންނާއި ފައިން ތަޅާ މާރާމާރީ ހިންގުމުން، ފަރުވާ ދެމުންދަނިކޮށް އެމީހާ މަރުވި މައްސަލައެކެވެ.

އިސްތިއުނާފުކުރި ދެފަރާތުން ބުނީ ޝައްކެއްނެތް މިންވަރަށް ދަޢުވާ ސާބިތުނުވާކަމަށާއި، މަރުވީ ކާކު ޖެހި ފަހަރަކުންކަން ނޭނގޭކަމަށާއި، ތަޙުޤީޤީ އިޢުތިރާފަކީ އަނިޔާކޮށްގެން ނެގި ބަޔާނެއްކަމަށާއި، އެހެން ދެމީހެއްގެ ޙުކުމް ހައިކޯޓުން ބާޠިލުކޮށް ދައުލަތުން އިލްތިމާސް ނުކުރުމުން ދަށުކޯޓުގެ ޙުކުމް ބާޠިލް ޙުކުމެއްކަން ދައުލަތުން ޤަބޫލުކޮށްފައިވާކަމަށެވެ.

ޤަޞްދުގައި މީހަކު މަރާލުމުގެ ކުށުގައި 2008 ގެ ކުރިން ޖިނާއީ ކޯޓުން ކުށްވެރިކޮށް މެރުމަށް ކުރި ޙުކުމުގައި، ތަޙުޤީޤަށް ދީފައިވާ އަދި ފަހުން ރުޖޫޢަވި އިޢުތިރާފާއި، ސުވާލުކުރުމުގެ ފުރުޞަތު ނުދީ ރަށުކޯޓު މެދުވެރިކޮށް ލިޔުމުން ނެގި ހެކިބަހަށް ބިނާކޮށް ކުށް ސާބިތުކުރުން ޤާނޫނުއަސާސީގެ 51 އާއި 52 ވަނަ މާއްދާތަކާ އެއްގޮތް ތޯއެވެ.

ދަށުކޯޓުގެ ޙުކުމް ބާޠިލު، އަލުން ބެލުމަށް ކްރިމިނަލް ކޯޓަށް ފޮނުވި

ތަޙުޤީޤީ އިޢުތިރާފަށް ޝަރީޢަތުގައި އިންކާރުކޮށްފައިވާތީ ޤާނޫނުއަސާސީގެ 52 ގެ ދަށުން އެއަށް ރިޢާޔަތް ނުކުރެވޭނެކަމާއި، ތިން ހެކިވެރިންގެ ހެކިބަސް ރަށުކޯޓު މެދުވެރިކޮށް ލިޔުމުން ނަގައި ސުވާލުކުރުމުގެ ފުރުޞަތު ނުދީފައިވާތީ 51 (ކ) ގެ ޙައްޤު ހިފެހެއްޓިފައި ނުވާކަމާއި، އެއް ހެކިވެރިއެއްގެ ޢަދުލުވެރިކަމާމެދު ސުވާލު އުފެދޭކަމާއި، ނުސީދާ ހެއްކަކަށް ހުރީ މެޑިކޯ ލީގަލް ރިޕޯޓު އެކަނިކަމަށް ބަލައި ޙުކުމް ބާޠިލުކުރިއެވެ.