އޮންދިގޯ ޕްރައިވެޓް ލިމިޓެޑް ވ. ޙައްވާ ހުޒްމާ

ވަޒީފާއާބެހޭ ޓްރައިބިއުނަލުން ނިންމީ މުވައްޒަފު ވަކިކޮށްފައިވާކަމަށް ބުރަވެވޭތީ، މައުޟޫޢީ އަދި އިޖުރާއީ ޢަދުލުވެރިކަން ޤާއިމުނުކޮށް ވަކިކުރުމުން 4 މަހުގެ މުސާރައާއި ޢިނާޔަތް ބަދަލުގެ ގޮތުގައި ދިނުމަށާއި، މުސާރައިން ޤާނޫނާ ޚިލާފަށް އުނިކުރި ފައިސާ ދިނުމަށާއި، ވަޒީފާގެ ބަޔާން ނުދީތީ ކުންފުނި ޖޫރިމަނާކުރުމަށެވެ.

ކުންފުންޏެއްގެ ހެޑް އޮފް ކޯޕަރޭޓްގެ މަޤާމުގައި 2 މަހާއި ކުޑަ ދުވަސްކޮޅެއް ވަޒީފާ އަދާކުރި މުވައްޒަފަކު، ޙާޟިރީއާ ބެހޭގޮތުން މެނޭޖިންގ ޑިރެކްޓަރާ ވާހަކަ ދެއްކުމަށްފަހު އޮފީހުން ނުކުމެގެން ގޮސް ވަޒީފާއަށް އަނބުރާ ނުނިކުމެ، އަނގަބަހުން ވަކިކުރިކަމަށާއި ކުންފުނީގެ ވައިބަރ ގްރޫޕްތަކުން ނެރުނުކަމަށް ބުނެ ޓްރައިބިއުނަލަށް މައްސަލަ ހުށަހެޅިއެވެ.

ކުންފުނިން ބުނީ ވަކިކުރިކަމުގެ އެއްވެސް ހެއްކެއް މުވައްޒަފު ހުށަނާޅާ ސާބިތުކުރުމުގެ ބުރަ ކުންފުނީގެ މައްޗަށް އަޅާފައިވަނީ 2010/SC-A/02 ގެ އުޞޫލާ ޚިލާފަށް ކަމަށާއި، ޚިލާފުވި މާއްދާއެއް ޓްރައިބިއުނަލުން ބަޔާނުކުރާ ކަމަށާއި، ވަޒީފާގެ ބަޔާން ދިނުމުގެ މުހުލަތު ހަމަނުވާތީ ޖޫރިމަނާ ނުކުރެވޭނެ ކަމަށެވެ. މުވައްޒަފު ބުނީ ލިޔުމެއްނެތި ވަކިކުރުމަކީ ނާއިންސާފު ކަމަށާއި، ގްރޫޕްތަކުން ނެރުމާއި މުސާރަ ނުދިނުމުން ވަކިކުރިކަން ދޭހަވާ ކަމަށެވެ.

އަނގަބަހުން ވަޒީފާއިން ވަކިކުރިކަމަށް މުވައްޒަފު ދަޢުވާކޮށް ވަޒީފާދޭ ފަރާތުން އެކަމަށް އިންކާރުކުރާއިރު، ވަޒީފާއިން ވަކިކުރިކަން ސާބިތުކުރުމުގެ ބުރަ އުފުލަންޖެހެނީ ކޮން ފަރާތަކަށްތޯ، އަދި ވައިބަރ ގްރޫޕްތަކުން ނެރުމަކީ ވަކިކުރިކަމުގެ ހެއްކެއްތޯ.

ދަށުކޯޓުގެ ނިންމުން ބާޠިލު

ވަކިކުރިކަން ސާބިތުކުރުމުގެ ބުރަ އޮތީ އެހެން ބުނާ މުވައްޒަފުގެ މައްޗަށްކަމަށާއި، ފާހަގަކުރި ހެކިން ހުށަނާޅާ، ހަމައެކަނި ވައިބަރ ގްރޫޕުގެ ސްކްރީންޝޮޓްތައް ހުށަހެޅުމުން ވަކިކުރިކަން ސާބިތުނުވާކަމަށާއި، ވަކިކުރިކަން ސާބިތުނުވެ ޢަދުލުވެރިކަން ބެލުމަކީ ކުރެވޭނެ ކަމެއް ނޫންކަމަށް ދެކި، ޓްރައިބިއުނަލުގެ ނިންމުން ބާޠިލުކުރެވުނެވެ.