ނިސާހު ވ. ޢަލީ ވަޙީދު

އޭދަފުށި މެޖިސްޓްރޭޓް ކޯޓުން ތަޅުއެޅުމަކީ އެއްބަސްވުމާ ޚިލާފު ޢަމަލެއްކަމަށް ކަނޑައަޅައި، މަހަކު 15,000 ރުފިޔާގެ މަގުން 56,180.87 ރުފިޔާ، ޢިމާރާތުގެ ޚަރަދު 180,055.20 ރުފިޔާ އަދި ވަކީލު ފީ 40,000 ރުފިޔާ ދިނުމަށް ޙުކުމްކޮށް، އެހެން ބައިތަކުގެ (450,000، 110,000، 5,568 ރުފިޔާ) ބަދަލު ނަގައިނުދިނުމަށް ނިންމިއެވެ.

ބ.އޭދަފުށީގައި ގާއެޅުމުގެ މަސައްކަތް ކުރުމަށް ދަޢުވާކުރާ ފަރާތުގެ ޚަރަދުގައި ޢިމާރާތެއް ކުރުމަށް ދެފަރާތް އަނގަބަހުން އެއްބަސްވިއެވެ. ތަނުގެ ވެރިފަރާތުން ތަޅުއަޅައި މަސައްކަތް ހުއްޓުވުމުން، ދަޢުވާކުރާ ފަރާތުން ގެއްލުމުގެ ބަދަލު ހޯދުމަށް ދަޢުވާކުރިއެވެ.

އިސްތިއުނާފުކުރި ފަރާތުން ބުނީ މެޝިނަރީޒްގެ ގެއްލުމާއި ޕާޗޭސް އޯޑަރުތަކުގެ ގެއްލުން ނަގައިނުދިނީ ހުށަހެޅި ހެކިތަކަށް ރިޢާޔަތްނުކޮށް، ފަނޑިޔާރުންގެ ޤާނޫނުގެ 5 (ށ) އާއި ކޮންޓްރެކްޓާބެހޭ ޤާނޫނުގެ 23 ވަނަ މާއްދާއާ ޚިލާފަށް ކަމަށެވެ.

އަނގަބަހުން ވި އެއްބަސްވުމާ ޚިލާފަށް ގުދަނުގައި ތަޅުއަޅައި ވިޔަފާރި ހުއްޓުވުމުން، ތަނުގައި ހުރި މެޝިނަރީޒްއަށް ލިބުނު ގެއްލުމާއި ޕާޗޭސް އޯޑަރުތައް ސަޕްލައި ނުކުރެވުމުން ލިބުނު ގެއްލުމުގެ ބަދަލު ނަގައިނުދިނުމަށް ދަށުކޯޓުން ނިންމި ނިންމުން ޞައްޙަވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ތަކެތި ނެރުމަށް ކުރި ޙުކުމާ އެއްގޮތަށް ޢަމަލުނުކުރީ އިސްތިއުނާފު ނުނިމޭތީ ކަމަށް ބުނުމަކީ ބަލައިގަނެވޭނެ ސަބަބެއް ނޫނެވެ. 2% ގެ ގެއްލުން ބުނީ ތަފްޞީލެއްނެތި އިފްތިރާޟްކޮށެވެ. ޕާޗޭސް އޯޑަރުތަކަކީ ތަޅުއެޅުމުގެ ގާތްގަނޑަކަށް 3 މަސް ކުރިން ލިބުނު ހުށަހެޅުންތަކެއްކަމާއި، ގެއްލުން ވީކަމުގެ ހެއްކެއް ނެތުމާއި، ހުއްދައާއި ސަޕްލަޔަރުގެ ނަން ދަޢުވާކުރާ ފަރާތުގެ މަސައްކަތާ ގުޅޭކަން ސާފުނުވާތީ ދަށުކޯޓުގެ ނިންމުމަށް ބަދަލު ގެންނަންޖެހޭ ސަބަބެއް ނެތެވެ.