ނަން ފޮރުވާފައި ވ. ނަން ފޮރުވާފައި

ހއ. ފެމިލީ އެންޑް ޗިލްޑްރަން ސަރވިސް ސެންޓަރުގެ އެސެސްމަންޓް ރިޕޯޓަށް ބަލައި، ތިނަދޫ މެޖިސްޓްރޭޓް ކޯޓުން އާއިލާއާބެހޭ ޤާނޫނުގެ 44 ވަނަ މާއްދާއަށް ރިޢާޔަތްކޮށް ކުއްޖާގެ ޙަޟާނަތު މަންމައަށް ލިބިގެންވާކަމަށް ކަނޑައަޅައި ކުއްޖާ ޙަވާލުކުރުމަށް އަންގައިފިއެވެ.

ކުއްޖާގެ ޙަޟާނަތު ކުރީގެ ޤަޟިއްޔާއަކުން ބައްޕަގެ މަންމައާ ޙަވާލުކޮށްފައިވަނިކޮށް، މާމަ ކުއްޖާއާމެދު އިހުމާލުވާކަމަށް ބުނެ މަންމަ ޙަޟާނަތަށް އެދި މައްސަލަ ހުށަހެޅިއެވެ. މައްސަލަ ހުށަހެޅުމަށްފަހު ކުއްޖާ ދައުލަތުގެ ބެލުމުގެ ދަށަށް ގެނެވުނެވެ.

މާމަ ބުނީ ޖަވާބުދާރީވުމާއި ހެކި ހުށަހެޅުމާއި ކުއްޖާއާ ސުވާލުކުރުމާއި ރިޕޯޓާމެދު ވާހަކަދެއްކުމުގެ ފުރުޞަތު ނުލިބޭ ކަމަށާއި، މަންމަ މަޙްރަމެއް ނޫން މީހަކާ ކައިވެނިކޮށްފައިވާތީ 42 (ހ) ގެ ދަށުން ޙަޟާނަތު ގެއްލިފައިވާ ކަމަށެވެ. މަންމަ ބުނީ ކުއްޖާ ބޭނުންވަނީ މަންމައާއެކު އުޅެން ކަމަށާއި، ކުއްޖާގެ އިޚްތިޔާރު އޮންނަންޖެހޭނެ ކަމަށެވެ.

ކުއްޖާގެ ޙަޟާނަތު މަންމައަށް ދިން ނިންމުމުގައި ޖަވާބުދާރީވުމާއި ހެކި ހުށަހެޅުމުގެ ފުރުޞަތު ދީފައިވޭތޯ، ކުއްޖާއާބެހޭ އިޖްތިމާޢީ އެސެސްމަންޓް ރިޕޯޓާމެދު ފަރާތްތަކަށް ވާހަކަދެއްކުމުގެ ފުރުޞަތު ދޭންޖެހޭތޯ، އަދި ދައުލަތުގެ ބެލުމުގެ ދަށަށް ގެނެވުނު ކުއްޖެއްގެ ޙަޟާނަތުގެ މައްސަލައިގައި އާއިލާއާބެހޭ ޤާނޫނުގެ 44 (ށ) ނުވަތަ ރީ-އިންޓެގްރޭޝަންގެ ގަވާއިދު ތަޠުބީޤުކުރަންޖެހޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް (ގިނަ ރައުޔުން)

ވަކީލެއްގެ އެހީގައި ޖަވާބުދާރީވުމުގެ ފުރުޞަތު ލިބިފައިވާތީއާއި، ކުއްޖާ ޙަޟާނަތުގެ ޢުމުރު ހަމަވެފައިވާތީ 42 (ހ) ތަޠުބީޤު ނުވާތީއާއި، އެސެސްމަންޓް ރިޕޯޓަކީ ޝަރީޢަތުން ހޯދާ ޚަބީރުގެ ރައުޔަކަށްވާތީއާއި، ކުއްޖާގެ ބަސްތަކަށް ކުއްޖާ ދައުލަތުގެ ބެލުމަށް ގެނެވުމުން ތާއީދު ލިބޭތީ، ދަށުކޯޓުގެ ނިންމުމަށް ބަދަލު ގެނެވޭނެ ހަމައެއް ނެތެވެ.