ނަން ސިއްރު ކުރެވިފައި ވ. ނަން ސިއްރުކުރެވިފައި

ފެމިލީ ކޯޓުން ބޮޑު ކުއްޖާގެ ޙަޟާނަތުގެ ޢުމުރު ހަމަވެފައިވާކަމަށާއި، ކުޑަ ކުއްޖާގެ ޙަޟާނަތު ބައްޕައާ ޙަވާލުކުރުމަކީ ކުއްޖާގެ މަޞްލަޙަތަށް އެންމެ ރަނގަޅު ގޮތްކަމަށް ބުރަނުވާތީ ޙަވާލުކުރާނެ ތަނެއް ނެތްކަމަށް ނިންމައި، ބައްޕައަށް ކުދިންނާ ބައްދަލުކުރުމާއި ފޯނުން ގުޅުމުގެ ފުރުޞަތު ފަހިކޮށްދިނުމަށް މަންމައަށް އެންގިއެވެ.

ވަރިވި ދެމަފިރިންގެ ދެކުދިންގެ ޙަޟާނަތު ކުރިން މެޖިސްޓްރޭޓް ކޯޓަކުން މަންމައާ ޙަވާލުކޮށްފައިވާއިރު، މަންމަ ކުދިންގެ ތަޢުލީމާއި ޞިއްޙަތަށް އިހުމާލުވާކަމަށް ބުނެ ބައްޕަ ދެވަނަ ފަހަރަށް ފެމިލީ ކޯޓުގައި ޙަޟާނަތަށް އެދުނެވެ. މައްސަލަ ހުށަހެޅިތާ ކުޑަދުވަހަކުން ބޮޑު ކުއްޖާގެ، އަދި އިސްތިއުނާފު ހުށަހެޅިއިރު ކުޑަ ކުއްޖާގެ ޙަޟާނަތުގެ ޢުމުރު ހަމަވެއްޖެއެވެ.

ބައްޕަ ބުނީ ޗައިލްޑް އެންޑް ފެމިލީ ޕްރޮޓެކްޝަން ސަރވިސްގެ އެސެސްމަންޓް ރިޕޯޓުތަކުގައިވާ ތަޢުލީމާއި ޞިއްޙަތަށް ވި އިހުމާލަށް ރިޢާޔަތް ނުކުރިކަމަށެވެ. ފަހުން ޙަޟާނަތުގެ ޢުމުރު ހަމަވެފައިވާތީ އެދޭގޮތް ބަދަލުކޮށް، މަންމަ އިހުމާލުވިކަމަށް ކަނޑައެޅުމަށް އެދުނެވެ. މަންމަ ބުނީ އެ ދަތިތައް ދިމާވީ ކޮވިޑްގެ ޙާލަތާއި ބޮޑު ކުއްޖާގެ ޞިއްޙީ ޙާލަތާ ގުޅިގެން ކަމަށެވެ.

ކުދިންގެ ޙަޟާނަތުގެ ޢުމުރު ހަމަވެފައިވާއިރު ޙަޟާނަތު ބަދަލުކުރުމަށް އެދޭ އިސްތިއުނާފަކުން ދެވެން ހުރި ފަރުވާއެއް އޮތްތޯ، އަދި ދަށުކޯޓުގައި ބަލާފައި ނުވާ މައުޟޫޢެއް (މަންމަ ކުދިންގެ ތަޢުލީމާއި ޞިއްޙަތަށް އިހުމާލުވިކަން) ހައިކޯޓަށް ފުރަތަމަ މަރުޙަލާގެ ކޯޓެއްގެ ގޮތުގައި ބެލޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދެކުދިންގެ ޙަޟާނަތުގެ ޢުމުރު ހަމަވެފައިވާތީ ޙަޟާނަތު ޙަވާލުކުރުމަކީ ދެވެން ހުރި ފަރުވާއެއް ނޫނެވެ. މަންމަ އިހުމާލުވިކަމުގެ މައުޟޫޢު ދަށުކޯޓުގައި ބަލާފައި ނުވާތީ ހައިކޯޓަށް އައު ޝަރީޢަތެއް ނުހިންގޭނެއެވެ. އެކަމަށް އައު މައްސަލައެއް ދަށުކޯޓަށް ހުށަހެޅުމުގެ ފުރުޞަތު އޮވެއެވެ.