މުޖްތަބާ ލަތީފް ވ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑް

ޓްރައިބިއުނަލުން ނިންމީ، އޭނާއަކީ ހިންގުމުގެ އިސް މަޤާމެއްގައި ހުރި މީހަކަށްވާތީ ޤާނޫނުގެ 1 ވަނަ ބާބުން އިސްތިސްނާވާ ފަރާތެއްކަމަށާއި، މައްސަލަ ބެލުމުގެ އިޚްތިޞާޞް ސިވިލް ކޯޓަށް ކަމުން ޓްރައިބިއުނަލަށް ނުބެލޭނެކަމަށެވެ.

މޯލްޑިވްސް އެއަރޕޯޓްސް ކޮމްޕެނީގެ ކޮމާޝަލް ޑިޕާޓްމަންޓް ހިންގުމުގެ ޒިންމާ އޮތް ޖެނެރަލް މެނޭޖަރަކު ޚިދުމަތް ބޭނުންނުވާކަމަށް ބުނެ ވަކިކުރުމުން، ވަޒީފާ އަނބުރާ ދިނުމާއި މުސާރަ ހޯދުމަށް ވަޒީފާއާބެހޭ ޓްރައިބިއުނަލަށް މައްސަލަ ހުށަހެޅިއެވެ.

އިސްތިއުނާފުކުރި ފަރާތުން ބުނީ އޭނާއަކީ ހިންގުމުގެ އިސް މަޤާމެއްގައި ހުރި މީހެއް ނޫންކަމަށާއި، އިޞްލާޙު ފާސްވުމުން ޓްރައިބިއުނަލަށް އިޚްތިޞާޞް ލިބުނުކަމަށެވެ. ކުންފުނިން ބުނީ އޭނާއަކީ އިސް މަޤާމެއްގެ މީހެއްކަމަށާއި، ވަކިކުރިއިރު އިޚްތިޞާޞް އޮތީ ސިވިލް ކޯޓަށް ކަމަށެވެ.

ހިންގުމުގެ އިސް މަޤާމެއްގައި ހުރިކަމަށް ބުނާ މުވައްޒަފަކު ވަކިކުރި މައްސަލަ ޓްރައިބިއުނަލުގައި ހިނގަމުންދަނިކޮށް ވަޒީފާއާބެހޭ ޤާނޫނަށް 6 ވަނަ އިޞްލާޙު ގެނެވި ޓްރައިބިއުނަލަށް އިޚްތިޞާޞް ލިބުމަށްފަހު، އިޚްތިޞާޞް ނެތްކަމަށް ޓްރައިބިއުނަލުން ނިންމުން ރަނގަޅުތޯ.

ޓްރައިބިއުނަލްގެ ނިންމުން ރަނގަޅު ނޫންކަމަށް އަޣުލަބިއްޔަތުން ނިންމި (މައްސަލަ ބެލުމުގެ އިޚްތިޞާޞް ޓްރައިބިއުނަލަށް)

އަޣުލަބިއްޔަތު ރައުޔުގައި، އިޚްތިޞާޞާއި އިޖުރާއާތުގެ ޤަވާޢިދުތަކަށް ރަޖުޢީ ނުހިންގުމުގެ އުޞޫލު ނުހިނގާތީ، މައްސަލަ ޓްރައިބިއުނަލުގައި ހިނގަމުންދަނިކޮށް އިޞްލާޙަށް ޢަމަލުކުރަން ފެށުމުން އިޚްތިޞާޞް ޓްރައިބިއުނަލަށް ލިބުނުކަމާއި، އޭގެ ފަހުން ނުބެލޭނެކަމަށް ނިންމުން ރަނގަޅު ނޫންކަމެވެ. ޚިލާފު ރައުޔުގައި، އިޞްލާޙު ރަޖުޢީކޮށް ނުހިނގާތީ ސިވިލް ކޯޓަށް އިޚްތިޞާޞް ދެމިއޮންނާނެކަމެވެ.