މޫސާ އިބްރާހީމް ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން ހަތަރު މީހުންވެސް ކުށްވެރިކޮށް، ކޮންމެ މީހަކު ޢުމުރަށް ޖަލަށްލުމާއެކު 100،000 ރުފިޔާގެ ޖޫރިމަނާއަށް ޙުކުމްކުރިއެވެ.

ފުލުހުންގެ އިންޓެލިޖެންސް މަޢުލޫމާތަކާ ގުޅިގެން އެޕާޓްމަންޓަކަށް ވަދެ، އިސްތިއުނާފުކުރި ފަރާތުގެ ޖީބުން 134.417 ގުރާމް އާއި ކޮޓަރިން 360.9376 ގުރާމް ކެނެބިސް ފެނުނުކަމަށް ބުނެ، އޭނާއާއި އިތުރު ތިން މީހެއްގެ މައްޗަށް ކެނެބިސް ޓްރެފިކްކުރުމުގެ ދަޢުވާ ކުރިއެވެ.

އިސްތިއުނާފުކުރި ފަރާތުން ބުނީ، ހެކި ހޯދާފައިވަނީ ޤާނޫނުއަސާސީގެ 47(ށ) އާއި 52 އާއި ކޯޓު އަމުރާ ޚިލާފަށް ކަމަށާއި، ތަޙުލީލު ހަދާފައިވަނީ 2014/HC-A/323 ގެ އުޞޫލާ ޚިލާފަށް ކަމަށާއި، ޝައްކުން އެއްކިބާވާ މިންވަރަށް ދަޢުވާ ސާބިތުނުވާ ކަމަށެވެ. ޕީޖީގެ އޮފީހުން ބަލާފާސްކުރުން އިޖުރާއީގޮތުން ރަނގަޅު ނޫންކަން ޤަބޫލުކުރިއެވެ.

ކޯޓު އަމުރާ ޚިލާފަށް ފުލުހުން ގެއަކަށް ވަދެ ބަލާފާސްކޮށް ހޯދި ހެކީގެ މައްޗަށް ކެނެބިސް ޓްރެފިކްކުރުމުގެ ކުށް ސާބިތުކުރެވިދާނެތޯ.

ދަށުކޯޓުގެ ޙުކުމުގެ އިސްތިއުނާފުކުރި ފަރާތާ ގުޅޭ ބައި ބާޠިލު

ކޯޓު އަމުރު ގެއަށް ގެންދެވުނީ ފުލުހުން ވަދެ ހައްޔަރުކުރުމަށްފަހުކަމާއި، ގޭގެ ވެރިފަރާތުގެ ޙާޟިރުގައި ބަލާފާސްނުކުރާކަމާއި، ކޯޓު އަމުރަކާނުލައި ވަނުމުގެ ޙާލަތެއް ދައްކާފައިނުވާތީ، ހޯދި ހެކި ޤާނޫނުއަސާސީގެ 52 ވަނަ މާއްދާގެ ދަށުން ޤަބޫލުނުކުރެވޭތީ ޙުކުމުގެ އިސްތިއުނާފުކުރި ފަރާތާ ގުޅޭ ބައި ބާޠިލުކުރިއެވެ.