އަޙްމަދު ޙަސަން ވ. ޕްރޮސިކިއުޓަރ ޖެނެރަލް

ހދ. ކުޅުދުއްފުށީ މެޖިސްޓްރޭޓް ކޯޓުން ކެނެބިސް ޓްރެފިކްކުރުމުގެ ކުށް ސާބިތުވާކަމަށް ކަނޑައަޅައި ޢުމުރަށް ޖަލަށްލުމާއެކު 100،000 ރުފިޔާއިން ޖޫރިމަނާކުރިއެވެ.

މަސްތުވާތަކެތި ގެންނަކަމުގެ މަޢުލޫމާތު ލިބިގެން ފުލުހުން ތުހުމަތުކުރެވޭ ފަރާތުގެ ގެކައިރިއަށް ދިޔައިރު މަޑުކުރަން ބުނުމުން އޭނާ ގެއަށް ދުވެ ވަނުމުން ހިފަހައްޓައި، ޕޮލިސް ސްޓޭޝަނުގައި ބަލައިފާސްކުރުމުން ޖީބުން 24.2372 ގްރާމް ކެނެބިސް ހުރި ދަޅެއް ފެނުނެވެ.

އިސްތިއުނާފުކުރި ފަރާތުން ބުނީ ހައްޔަރުކޮށް ހެކި ހޯދީ ޤާނޫނުއަސާސީގެ 46، 47، 52 އަދި 268 ވަނަ މާއްދާއާ ޚިލާފަށްކަމަށާއި، ވަކީލެއްގެ ޙައްޤު ނުދެވުނުކަމަށާއި، ތަޙްލީލު ރިޕޯޓަށް ދިފާޢުވުމުގެ ފުރުޞަތު ނުދެވުނުކަމަށާއި، ދަޢުވާ ޝައްކެއް ނެތް މިންވަރަށް ސާބިތު ނުވާކަމަށެވެ.

ކޯޓު އަމުރަކާ ނުލައި ގެއަށް ވަދެ ހައްޔަރުކޮށް ހޯދި ހެކީގެ މައްޗަށް ކުށް ސާބިތުކުރުމަކީ ޤާނޫނުއަސާސީއާ ޚިލާފު ކަމެއްތޯ، ތުހުމަތުކުރެވޭ ފަރާތަށް ވަކީލެއްގެ ފުރުޞަތާއި މަސްތުވާތަކެތީގެ ތަޙްލީލު ރިޕޯޓަށް ދިފާޢުވުމުގެ ފުރުޞަތު ދެވިފައިވޭތޯ، އަދި ކެނެބިސް ޓްރެފިކްކުރުމުގެ ދަޢުވާ އެކަށީގެންވާ ޝައްކެއް ނެތް މިންވަރަށް ސާބިތުވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހައްޔަރުކުރީ އެކަށީގެންވާ ސަބަބުތަކެއްގެ މައްޗަށް ޤާނޫނުއަސާސީގެ 46 ވަނަ މާއްދާއާ އެއްގޮތަށް ކަމަށާއި، ވަކީލުގެ ފުރުޞަތު ދީފައިވާކަމަށާއި، ތަޙްލީލު ރިޕޯޓާ ބެހޭގޮތުން ސުވާލެއް ނެތްކަމަށް ދިފާޢުގެ ވަކީލު ބުނެފައިވާތީ ފުރުޞަތު ނުދެވުނުކަމަށް ނުބެލެވޭކަމަށާއި، ދިފާޢުން ފާހަގަކުރި ކަންކަމުން އެކަށީގެންވާ ޝައްކެއް ނުއުފެދޭކަމަށް ކޯޓުން ކަނޑައެޅިއެވެ.