މުޙައްމަދު ސިޔާޒް ވ. ފުޓްބޯލް އެސޯސިއޭޝަން އޮފް މޯލްޑިވްސް

ޓްރައިބިއުނަލުން ކަނޑައެޅީ ފުރަތަމަ ވެވުނީ 30,000 ރުފިޔާގެ މުސާރައަށް އަނގަބަހުން ވެވުނު އެއްބަސްވުމެއްކަމަށާއި، ލިޔުމުން ހެދި ކޮންޓްރެކްޓަކީ ކޮރެއަން ފުޓްބޯޅަ ފެޑަރޭޝަނުން ފައިސާ ހަމަޖެހިއްޖެނަމަ ދޭން ހެދި އެއްބަސްވުމެއްކަމަށް ސާބިތުވާތީ، އެދިފައިވާ އަމުރު ނުކުރެވޭނެކަމަށެވެ.

އެފް.އޭ.އެމްގެ ޓެކްނިކަލް ޑިރެކްޓަރުގެ ގޮތުގައި ވަޒީފާ އަދާކުރި ފަރާތަކީ ލިޔުމުން ސޮއިކުރި ކޮންޓްރެކްޓުގައި މަހަކު $3000 ގެ މުސާރަ ކަނޑައެޅި ނަމަވެސް މަހަކު 30,000 ރުފިޔާ ދިން ކަމަށާއި 24 މަހުގެ ތަފާތު $25,307.39 ހޯދައިދިނުމަށް ވަޒީފާއާބެހޭ ޓްރައިބިއުނަލަށް މައްސަލަ ހުށަހެޅިއެވެ.

އިސްތިއުނާފުކުރި ފަރާތުން ބުނީ ކިތާބީ ހެކި އޮއްވާ ޝަފަވީ ހެކިން އެ ނަފީކުރީ ކަމަށާއި، އަނގަބަހުގެ އެއްބަސްވުމަކީ ވަޒީފާއާބެހޭ ޤާނޫނާ ޚިލާފު އެއްބަސްވުމެއްކަމަށާއި، މުސާރަ ލަސްވާތީ ޝަކުވާކޮށްފައިވާކަމަށެވެ. އެފް.އޭ.އެމް އިން ބުނީ ޓްރައިބިއުނަލަށް މައްސަލަ ނުބެލޭނެކަމަށެވެ.

ފުޓްބޯޅަ އެސޯސިއޭޝަން އޮފް މޯލްޑިވްސްގެ ޓެކްނިކަލް ޑިރެކްޓަރަކަށް ނުދީ ހިފަހައްޓާފައިވާ މުސާރަ ހޯދުމަށް ހުށަހެޅި މައްސަލައަކީ، އެފް.އޭ.އެމްގެ ހިންގާ ޤަވާއިދާއި ފީފާގެ ސްޓެޓިއުޓަށް ބަލާއިރު، ވަޒީފާއާބެހޭ ޓްރައިބިއުނަލަށް ބަލާ ނިންމުމުގެ އިޚްތިޞާޞް ލިބިގެންވާ މައްސަލައެއްތޯ.

ޓްރައިބިއުނަލުގެ ނިންމުން ބާޠިލު (އިޚްތިޞާޞް ނެތް)

ޓެކްނިކަލް ޑިރެކްޓަރަކީ އެފް.އޭ.އެމްގެ އޮފިޝަލެއްކަމުން، ހިންގާ ޤަވާއިދާއި ފީފާ ސްޓެޓިއުޓުގެ ދަށުން އެ މައްސަލަ ހުށަހަޅަންވާނީ ހިންގާ ޤަވާއިދުގައިވާ ޖުޑީޝަލް ދާއިރާތަކަށެވެ. ޓްރައިބިއުނަލަށް އިޚްތިޞާޞް ނެތުމުން ނިންމުން ބާޠިލުކުރިއެވެ.