2015/HC-A/307

ވަޒީފާއާބެހޭ ޓްރައިބިއުނަލުން، ސަލާމުގެ ޗުއްޓީއަކާ ގުޅުވައިގެން ސަރވިސް އެލަވަންސުން އުނިކުރުމަކީ ވަޒީފާއާބެހޭ ޤާނޫނުގެ 24 (ށ) ގައިވާ ހާލަތަކަށް ފެތޭ އުނިކުރުމެއް ނޫންކަމަށް ކަނޑައަޅައި، އުނިކުރި ފައިސާ 14 ދުވަހުގެ ތެރޭގައި ދޭން އަމުރުކޮށްފައިވެއެވެ.

މިނިސްޓްރީ އޮފް ފިޝަރީޒް އެންޑް އެގްރިކަލްޗަރގައި ވަޒީފާ އަދާކުރާ މުވައްޒަފަކު ބަލިވެގެން އެއް ދުވަހުގެ ސަލާމުގެ ޗުއްޓީއެއް ނެގުމުން، ސިވިލް ސަރވިސްގެ ޤަވާޢިދާ އެއްގޮތަށް އޭނާގެ ސަރވިސް އެލަވަންސުން ފައިސާ އުނިކޮށްފައިވެއެވެ.

ދައުލަތުން ބުނީ، ޓްރައިބިއުނަލުގެ ނިންމުމަކީ ޤާނޫނުއަސާސީގެ 144 (ނ) (ޙުކުމުގައި 644 ކަމަށް ލިޔެވިފައި) އާއި ސުޕްރީމް ކޯޓުގެ 2011/SC-C/24 ޤަޟިއްޔާއިން ކަނޑައަޅާފައިވާ އުޞޫލާ ޚިލާފު ނިންމުމެއްކަމަށެވެ.

ބަލިވެގެން ސަލާމުގެ ޗުއްޓީގައި ހުރި ދުވަސްތަކަށް ސިވިލް ސަރވިސް މުވައްޒަފެއްގެ ސަރވިސް އެލަވަންސުން ފައިސާ އުނިކުރުމަކީ ވަޒީފާއާބެހޭ ޤާނޫނާ ޚިލާފު ކަމެއްތޯއާއި، ސިވިލް ސަރވިސްގެ ޤަވާޢިދުގައި އެކަން ހުއްދަކޮށްފައިވުމުން ބަލަންޖެހޭނީ ޤާނޫނަށްތޯ ޤަވާޢިދަށްތޯ.

އިސްތިއުނާފު ބާޠިލް، ޓްރައިބިއުނަލްގެ ނިންމުން ޤާއިމް

ސަރވިސް އެލަވަންސަކީ އުޖޫރައިގެ ތެރޭގައި ހިމެނޭ އެއްޗަކަށްވެ، ސަލާމުގެ ޗުއްޓީއަކީ ޤާނޫނުގެ ދަށުން އުޖޫރައާއިއެކު ޙައްޤުވާ ޗުއްޓީއަކަށްވާއިރު، ޤާނޫނުން ލިބިދޭ ޙައްޤަށް އުނިކަންލިބޭ ޤަވާޢިދުގެ މާއްދާއަކީ ބާޠިލު މާއްދާއަކަށްވާތީ، ބަލަންޖެހޭނީ ވަޒީފާއާބެހޭ ޤާނޫނަށްކަމަށް ކަނޑައަޅައި ޓްރައިބިއުނަލުގެ ނިންމުން ޤާއިމުކޮށްފައިވެއެވެ.