މުޙައްމަދު ޝުޖާޢު ވ. ޕްރޮސިކިއުޓަރ ޖެނެރަލް

ހެކި ނައްތާލުމާއި ހެކިވެރިންނަށް ނުފޫޒު ފޯރުވުމާއި މުޖުތަމަޢުގެ ސަލާމަތަށް ނުރައްކަލެއް ކުރިމަތިވުމުގެ ސަބަބުން ޝަރީޢަތް ނިމެންދެން ބަންދުގައި ބެހެއްޓުމަށް ފިޔޯރީ މެޖިސްޓްރޭޓް ކޯޓުން އަމުރުކުރިއެވެ.

އިސްތިއުނާފުކުރި ފަރާތް ދިރިއުޅޭ ކޮޓަރިން މަސްތުވާތަކެތިކަމަށް ޝައްކުކުރެވޭ ޕެކެޓްތަކެއް ފެނުމުން، ތިނަދޫ މެޖިސްޓްރޭޓް ކޯޓުގެ އަމުރެއްގެ ދަށުން ގދ. ފަރެސްމާތޮޑާއިން ހައްޔަރުކޮށް، ފަރެސްމާތޮޑާ ކޯޓުގައި އެވަގުތު މެޖިސްޓްރޭޓަކު ނެތުމުން ފިޔޯރީ މެޖިސްޓްރޭޓް ކޯޓަށް ހާޟިރުކުރެވުނެވެ.

އިސްތިއުނާފުކުރި ފަރާތުން ބުނީ ބަންދާމެދު ގޮތެއް ނިންމީ ހުރި ރަށުގެ ކޯޓު ނޫން ކޯޓަކުން ކަމަށާއި، އަމުރުގެ ލެޓަރހެޑުގައި 'ގދ. ވާދޫ' އޮތުމާއި، ހައްޔަރުކުރުމުގައި ސަބް އިންސްޕެކްޓަރެއްގެ ހުއްދަ ނުހޯދުމާއި، ޝަރީޢަތް ނިމެންދެން ބަންދުކުރުމުގެ ޝަރުޠު ފުރިހަމަނުވާ ކަމަށެވެ. ޕްރޮސިކިއުޓަރ ޖެނެރަލްގެ ފަރާތުން ބުނީ މެޖިސްޓްރޭޓަކު ނެތުމުން ދާއިރާގެ އިސްމެޖިސްޓްރޭޓް ކަނޑައެޅި ގޮތަށް ހާޟިރުކުރި ކަމަށާއި ލެޓަރހެޑުގެ މައްސަލައަކީ އިދާރީ އޮޅުމެއް ކަމަށާއި ކޯޓު އަމުރަށް އެދުމުގައި ސަބް އިންސްޕެކްޓަރުގެ ހުއްދަ ހޯދި ކަމަށެވެ.

މަސްތުވާތަކެތީގެ ވިޔަފާރީގެ ތުހުމަތުގައި ހައްޔަރުކުރެވުނު ފަރާތެއް ޝަރީޢަތް ނިމެންދެން ބަންދުގައި ބެހެއްޓުމަށް ގދ. ފިޔޯރީ މެޖިސްޓްރޭޓް ކޯޓުން ނެރުނު އަމުރު، ބަންދާމެދު ގޮތެއް ނިންމި ކޯޓާއި، ހައްޔަރުކުރުމުގެ އިޖުރާއާތާއި، ފުލުހުންގެ މަރުކަޒުން ހައްޔަރާމެދު ގޮތެއް ނިންމި ގޮތާއި، ޝަރީޢަތް ނިމެންދެން ބަންދުކުރުމުގެ ޝަރުޠުތަކާ ބެހޭ ގޮތުން ޤާނޫނާއި ޤަވާއިދާ ޚިލާފަށް ނެރުނު އަމުރެއްތޯ.

އިސްތިއުނާފު ބާޠިލު، ދަށުކޯޓުގެ އަމުރު ޤާއިމް

ޤަވާއިދުގެ 3 ވަނަ މާއްދާގެ (ރ) އާއި (ބ) ގެ ދަށުން އެހެން ކޯޓަކަށް ހާޟިރުކުރުން ހުއްދަ ކަމަށާއި، ލެޓަރހެޑުގެ އޮޅުމަކީ އަމުރު ބާޠިލުކުރާ ސަބަބެއް ނޫންކަމަށާއި، ސަބް އިންސްޕެކްޓަރުގެ ހުއްދައާއެކު ހޯދި ކޯޓު އަމުރެއްގެ ދަށުން ހައްޔަރުކުރުމުން އިޖުރާއާތު ފުރިހަމަވާ ކަމަށާއި، ޖިނާއީ ބޮޑު ކުށެއްގެ ތުހުމަތުގައި ހެކި ހުރުމުން ޝަރީޢަތް ނިމެންދެން ބަންދުކުރުން ޤާނޫނާ ޚިލާފެއް ނޫން ކަމަށް ކަނޑައެޅިއެވެ.