މުޙައްމަދު އަޙްމަދު ދީދީ ވ. ނިޒާރު އަޙްމަދު

ދަޢުވާލިބޭ ފަރާތްތަކުން އިންކާރުކޮށްފައިވާއިރު، އެ ފައިސާއަކީ އެ ފަރާތްތަކުން ދޭންޖެހޭ ފައިސާއެއްކަން ސާބިތުވާނެ ކާފީ ހެއްކެއް ދަޢުވާކުރި ފަރާތަށް ދެއްކިފައިނުވާތީ ފައިސާ ނަގައިނުދެވޭނެކަމަށް ސިވިލް ކޯޓުން ޙުކުމްކުރިއެވެ.

އިސްތިއުނާފުކުރި ފަރާތުގެ ނަމުގައި ޏ. ފުވައްމުލަކުގައި ހިންގި ފިހާރައެއް އޮޑިޓްކުރިއިރު 23,173,947 ރުފިޔާ ފިހާރައިގެ އެކައުންޓަށް ޖަމާނުކުރާކަމަށް ފާހަގަވުމުން، ފިހާރަ ހިންގަން ޙަވާލުކުރި ތިން މީހުންގެ އަތުން އެ ފައިސާއާއި ގެއްލުމުގެ ބަދަލާއި ވަކީލުގެ ފީ ހޯދުމަށް ދަޢުވާކުރިއެވެ.

އިންޓަނޭޝަނަލް އޮޑިޓް ފާމެއް ކަމަށްވާ އާނަސްޓް އެންޑް ޔަންގުން ތައްޔާރުކުރި އޮޑިޓް ރިޕޯޓުގެ ޞައްޙަކަމާމެދު ސުވާލު އުފެދޭކަށް ނެތްކަމަށާއި، ދަޢުވާ ފޯމާއެކު ހުށަހެޅި ލިޔެކިޔުންތަކުގައިވާ ފައިސާއާ މެދު ޢަމަލުކުރި ގޮތް ކޯޓުން ސާފުކޮށްފައިނުވާކަމަށާއި، ފިހާރައިގެ ކަންތައް ބަލަހައްޓަމުންދިޔައީ ކުންފުންޏުން ކަމަށް ހުށަހެޅި ލިޔުންތަކަށް ރިޢާޔަތްނުކުރިކަމަށް އިސްތިއުނާފުކުރި ފަރާތުން ބުންޏެވެ.

ފަރުދީ ނަމުގައި ރަޖިސްޓްރީކުރެވިފައިވާ ފިހާރައެއްގެ ފައިސާ ޖަމާނުކުރި ކަމަށް ބުނެ ވެރިފަރާތުން އަމިއްލަ ޙައިޘިއްޔަތުން ކުރި ދަޢުވާގައި، ކުންފުންޏެއްގެ މުޢާމަލާތްތަކާ އެއްކޮށް މަސްހުނިވެފައިވާ އޮޑިޓް ރިޕޯޓަކާއި ލިޔެކިޔުންތަކުން ދަޢުވާ ސާބިތުވޭތޯއާއި، ދަޢުވާ ހުށަހަޅަންޖެހޭނީ ކޮން ފަރާތަކުންތޯ.

ދަށުކޯޓުގެ ޙުކުމް ބާޠިލު؛ ހިސާބުތައް ވަކިކޮށް ދަޢުވާ އަލުން ހުށަހެޅުމުގެ ފުރުޞަތު އޮތްކަމަށް ކަނޑައެޅި

އޮޑިޓް ރިޕޯޓާއި ލިޔެކިޔުންތަކުގައި ފަރުދީ ވިޔަފާރިއާއި ކުންފުނީގެ މުޢާމަލާތްތައް މަސްހުނިވެފައިވާތީ ދަޢުވާ އެގޮތަށް ސާބިތުނުވާނެ ނަމަވެސް، އެ ހެކިތަކަކީ ބަލައިގަނެވޭނެ ހެކިތަކެއް ކަމަށްވާތީ ފަރުދީ ފިހާރައިގެ ހިސާބުތައް ވަކިކޮށް އަލުން ދަޢުވާ ހުށަހެޅުމުގެ ފުރުޞަތު ދީ ދަށުކޯޓުގެ ޙުކުމް ބާޠިލުކުރިއެވެ.