ލިއުޝާން އިބްރާހީމް ވ. މަރްޔަމް ނާއިލާ

ފެމިލީ ކޯޓުން، ވަރިކުރިތާ ހިޖުރީގޮތުން 10 މަހާއި 17 ދުވަހުން ވިހޭ ކުއްޖާއަކީ ދަރި ލެއްވުމުގެ އެންމެ ދިގު މުއްދަތު (އެއް އަހަރު) ގެ ތެރޭގައި ވިހޭ ކުއްޖެއްކަމަށް ބަލައި ނަސަބު ފިރިމީހާގެ މައްޗަށް ސާބިތުކުރި.

ދެމީހުން 2017 އޭޕްރީލް 25 ގައި ވަރިވުމަށްފަހު 2018 މާރިޗު 2 ގައި އަންހެންމީހާ ދުވަސް ފުރާ ކުއްޖަކު ވިހައި، އެ ކުއްޖާގެ ނަސަބު ކުރީގެ ފިރިމީހާގެ މައްޗަށް ސާބިތުކުރުމަށް އެދި ދަޢުވާކުރި. ފިރިމީހާ ބުނީ ވަރިކުރުމުގެ ދެމަސް ކުރިން ޖިމާޢުވުން ހުއްޓާލާފައިވާކަމަށާއި ބަލިވި ތާރީޚު ވަރީގެ ފަހުކަމަށެވެ.

އިސްތިއުނާފުކުރި ފަރާތުން ބުނީ ޤާނޫނު ނަންބަރު 4/2000 (ޢާއިލާއާބެހޭ ޤާނޫނު) ގެ 52 ވަނަ މާއްދާގެ (ނ) އަށް ރިޢާޔަތްނުކުރި ކަމަށާއި، ޖިމާޢު ހުއްޓާލިކަމަށް ބުނާ ބުނުމަށް އިންކާރުނުކުރި ކަމަށާއި، ޤާނޫނުއަސާސީގެ 42 ވަނަ މާއްދާގެ ޙައްޤު ހަނިވި ކަމަށާއި، މައްސަލަ ދިރާސާނުކުރި ކަމަށް؛ އަދި ލިޢާނަށް ފުރުޞަތު ދިނުމަށް އެދުނެވެ.

ވަރިކުރިތާ ހިޖުރީގޮތުން 10 މަހާއި 17 ދުވަހުން ވިހޭ ކުއްޖާގެ ނަސަބު ކުރީގެ ފިރިމީހާގެ މައްޗަށް ސާބިތުކުރުމުގައި ފެމިލީ ކޯޓުން ޢާއިލާއާބެހޭ ޤާނޫނުގެ 52 ވަނަ މާއްދާއާއި ޢާއިލާއާބެހޭ ޤަވާޢިދުގެ 81 ވަނަ މާއްދާ ތަޠުބީޤުކުރި ގޮތް ރަނގަޅުތޯއާއި، ދަށުކޯޓުގައި ނުދެކެވޭ ލިޢާނުގެ ނުކުތާ އިސްތިއުނާފުގައި ބަލަންވީތޯއާއި، ޤާނޫނުއަސާސީގެ 42 ވަނަ މާއްދާގެ ޙައްޤު ހަނިވިތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ލިޢާނުގެ ނުކުތާ ދަށުކޯޓުގައި ނުދެކެވޭތީ އިސްތިއުނާފުގައި ނުބެލެވޭނެ؛ ޖިމާޢު ހުއްޓާލިކަމަށް ބުނުމަށް އަންހެންމީހާ އިންކާރުކޮށްފައިވާއިރު ވަރީގެ ލިޔުންތަކުގައި އިން ޙާލަތު ނޭނގޭކަމަށް ބަޔާންކޮށްފައިވޭ؛ ވަކީލަކާއެކު ފުރިހަމަ ފުރުޞަތު ލިބިފައިވޭ؛ ދަށުކޯޓުން ހެކި ޤަރީނާއަށް ޝަރުޢީ އަދި ޞިއްޙީ ގޮތުން ބަލައި ނިންމާފައިވޭ.