ޖޯން ޗާލްސް ސީފާޓް ވ. ވަކީލް ޗެމްބަރސް އެލްއެލްޕީ

ސިވިލް ކޯޓުން ފައިސާ ދައްކަންޖެހޭކަން މުސްތަނަދުތަކުން ސާބިތުވެއްޖެކަމަށް ކަނޑައަޅައި، އެއް މަސްދުވަހުގެ ތެރޭގައި ދައްކާ ޚަލާޞްކުރުމަށް ދަޢުވާލިބުނު ފަރާތުގެ ޣައިރު ޙާޟިރުގައި ޙުކުމްކުރިއެވެ.

ޤާނޫނީ އެހީތެރިކަން ފޯރުކޮށްދިނުމަށް 4 ސެޕްޓެމްބަރ 2014 ގައި ވެފައިވާ އެއްބަސްވުމުގެ ދަށުން ވަކީލް ޗެމްބާރސް އެލް.އެލް.ޕީން ފޯރުކޮށްދިން ޤާނޫނީ ޚިދުމަތުގެ އަގުގެ ތެރެއިން ނުދައްކާހުރި ފައިސާ ހޯދުމަށް ސިވިލް ކޯޓުގައި ދަޢުވާކުރި މައްސަލައެކެވެ.

އިސްތިއުނާފުކުރި ފަރާތުން ބުނީ، އޭނާގެ ބަހެއް ނުހޯދައި ޙުކުމްކުރުމަކީ "އަނެއްފަރާތުގެ ވާހަކަ އަޑުއެހުމުގެ" އުޞޫލާ ޚިލާފު ކަމަށާއި، ޣައިރު ޙާޟިރުގައި ޙުކުމްކުރުމަކީ ޝަރީޢަތްކުރުމާބެހޭ ޤަވާޢިދާއި ކޯޓަށް މީހުން ޙާޟިރުކުރުމުގެ ޤަވާޢިދާ ޚިލާފު ކަމަށެވެ.

ދަޢުވާލިބޭ ފަރާތުގެ ބަހެއް ނުހޯދައި ޣައިރު ޙާޟިރުގައި ސިވިލް ކޯޓުން ކުރި ޙުކުމަކީ "އަނެއްފަރާތުގެ ވާހަކަ އަޑުއެހުމުގެ" އުޞޫލާއި ޝަރީޢަތްކުރުމާބެހޭ ޤަވާޢިދާއި ކޯޓަށް މީހުން ޙާޟިރުކުރުމުގައި ޢަމަލުކުރާ ގޮތުގެ ޤަވާޢިދާ ޚިލާފު ޙުކުމެއްތޯ؛ އަދި ޤާނޫނީ ޚިދުމަތުގެ އަގު ދައްކަން ޖެހޭކަން ސާބިތުވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އެއްބަސްވުމާމެދު އިންކާރެއް ނުކުރާކަމާއި، ދެ އަމުރަށް ޙާޟިރުވެ ދަޢުވާ އެނގި އެއްޗެއް ބުނުމުގެ ފުރުސަތު ލިބި، ފަހުން އަމުރާ ޙަވާލުވުމަށް އިންކާރުކުރިކަމާއި، ފައިސާ ދައްކަންހުރިކަމަށް އީ-މެއިލްތަކުގައި ބުނެފައިވާކަމާމެދު ސުވާލެއް ނުއުފައްދާކަން ފާހަގަކޮށް، ޙުކުމަށް ބަދަލުގެންނަންޖެހޭ ސަބަބެއް ނުފެނުނެވެ.