2016/HC-A/331

އިނގުރައިދޫ މެޖިސްޓްރޭޓް ކޯޓުން ސެޓްލްމެންޓް އެގްރީމަންޓަކީ މުއްދަތު ހަމަވުމުން ބާޠިލްވެފައިވާ އެއްބަސްވުމެއް ކަމަށާއި، ބާޠިލްވެފައިވާ އެއްބަސްވުމެއް ބާޠިލްކުރުމަށް އަމުރެއް ނުކުރަން ޖެހޭކަމަށް ކަނޑައަޅައި، ސައިޓާއި މުދާ 3 ދުވަހުގެ ތެރޭގައި ޙަވާލުކުރުމަށް އަމުރުކުރިއެވެ.

ޖީ.އާރު.ޕީ ބޯޓް ބިލްޑަރސް ޕްރައިވެޓް ލިމިޓެޑާއި ގްލެޑޯނިއާ މޯލްޑިވްސް ޕްރައިވެޓް ލިމިޓެޑާ ދެމެދު ވި އެއްބަސްވުމާއި ސެޓްލްމެންޓް އެގްރީމަންޓާ ޚިލާފަށް ޢަމަލުކުރި ކަމަށްބުނެ، އެއްބަސްވުން ބާޠިލްކޮށް ޙަވާލުގައި ހުރި ތަކެތި އަދި ސައިޓް ޙަވާލުކުރުމަށް އެދި ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ކޮންޓްރެކްޓާބެހޭ ޤާނޫނުގެ 20 (ހ) އަށް ރިޢާޔަތްނުކޮށް މައްސަލަ ނިންމި ކަމަށާއި، ކޯޓަށް މީހުން ޙާޟިރުކުރުމުގެ ޤަވާއިދުގެ އިޖުރާއާތު ފުރިހަމަނުކޮށް މައްސަލަ ނިންމި ކަމަށެވެ.

ޖަވާބުދާރީވުމަށްފަހު ޙާޟިރުނުވާ ދަޢުވާލިބޭ ފަރާތެއްގެ ޣައިރު ޙާޟިރުގައި މައްސަލަ ނިންމުމަކީ ކޯޓަށް މީހުން ޙާޟިރުކުރުމުގެ ޤަވާއިދާ ޚިލާފު ކަމެއްތޯއާއި، މުއްދަތު ހަމަވެގެން ބާޠިލްވެފައިވާ އެއްބަސްވުމެއްގެ ދަށުން ޙަވާލުގައި ހުރި ސައިޓާއި މުދާ ޙަވާލުކުރުމަށް ނިންމުމަކީ ކޮންޓްރެކްޓާބެހޭ ޤާނޫނުގެ 20 (ހ) އާ ޚިލާފު ނިންމުމެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އިސްތިއުނާފުކުރި ފަރާތަށް ޖަވާބުދާރީވުމުގެ ފުރުޞަތު ދީފައިވާއިރު ފަހުން ޙާޟިރުނުވުމުން ޣައިރު ޙާޟިރުގައި ނިންމުމަކީ ޤަވާއިދާ ޚިލާފު ކަމެއް ނޫނެވެ. އެއްބަސްވުން މުއްދަތު ހަމަވެގެން ބާޠިލްވެފައިވާކަމަށް އިސްތިއުނާފުކުރި ފަރާތުން ވެސް ބުނާތީ ޚުޞޫމަތެއް ނެތުމާއެކު، ޙަވާލުކުރުމަށް ނިންމި ނިންމުމަކީ 20 (ހ) އާ ޚިލާފު ނިންމުމެއްކަން ދައްކާނެ ސަބަބެއް ބުނެދެވިފައި ނުވެއެވެ.