ޕްރޮސިކިއުޓަރ ޖެނެރަލް ވ. ޔާމީން އަންވަރު

ހިންމަފުށި މެޖިސްޓްރޭޓް ކޯޓުން (H6C/2019/02، 27 ޖަނަވަރީ 2019) މައްސަލަ ނުނިމި ގިނަދުވަސް ވަމުންދާތީއާއި ތުހުމަތުކުރެވޭ ފަރާތުގެ ޙައްޤުތައް ގެއްލިގެންދާތީ ގޭބަންދަށް ބަދަލުކުރުމަށް އަމުރުކުރިއެވެ.

ޢާންމު މަޞްލަޙަތަށް ގެއްލުންހުރި ޢަމަލެއް ކުރުމުގެ ތުހުމަތުގައި ދައުލަތުން ދަޢުވާކޮށް، ތުހުމަތުކުރެވޭ ފަރާތް 2 މަސް ދުވަހު ބަންދުގައި ހުއްޓެވެ.

ޕްރޮސިކިއުޓަރ ޖެނެރަލް ބުނީ އަމުރަކީ ޤާނޫނުއަސާސީގެ 49 ވަނަ މާއްދާއާއި ޖިނާއީ އިޖުރާއަތުގެ ޤާނޫނުގެ 59 އާއި 60 ވަނަ މާއްދާއާ ޚިލާފު، އަދި ޤާނޫނުއަސާސީގެ 143(ރ) ގެ ދަށުން މަތީ ކޯޓުތަކުގެ ނިންމުންތަކަށް ތަބާނުވެ ނެރުނު އަމުރެއް ކަމަށެވެ.

ޢާންމު މަޞްލަޙަތަށް ގެއްލުންހުރި ޢަމަލެއް ކުރުމުގެ ތުހުމަތުގައި ބަންދުގައި ހުރި ފަރާތެއް ގޭބަންދަށް ބަދަލުކުރުމަށް މެޖިސްޓްރޭޓް ކޯޓުން ނެރުނު އަމުރަކީ ޖިނާއީ އިޖުރާއަތުގެ ޤާނޫނުގެ ދަށުން ނެރެވޭނެ އަމުރެއްތޯ.

ދަށުކޯޓުގެ އަމުރު ބާޠިލު؛ ބަންދާމެދު އަލުން ނިންމުމަށް ދަށުކޯޓަށް ކަނޑައެޅި (ރައްދުވާ ފަރާތުގެ ޣައިރު ޙާޟިރުގައި)

ޖިނާއީ އިޖުރާއަތުގެ ޤާނޫނުގެ 60(ހ) ގައިވާ 4 ގޮތުގެ ތެރޭގައި ގޭބަންދު ނުހިމެނޭތީއާއި، ހައިކޯޓުގެ 2018/HC-A/142 ގައި ގޭބަންދު ނުކުރެވޭނެކަމަށް ކަނޑައަޅާފައިވާތީ، އަމުރަކީ އެ އުޞޫލާ ޚިލާފު އަމުރެކެވެ. ބަންދާމެދު އަލުން ނިންމަންވީ މައްސަލަ ބަލާ ފަނޑިޔާރެވެ.