އިސްމާޢީލް ނާހިދު ވ. ޕްރޮސިކިއުޓަރ ޖެނެރަލް

ހުޅުދެލި މެޖިސްޓްރޭޓް ކޯޓުން ކުށް ސާބިތުކޮށް، އުމުރަށް ޖަލަށް ލުމާއެކު 100,000 ރުފިޔާގެ ޖޫރިމަނާ ކަނޑައެޅިއެވެ.

މަސްތުވާތަކެތި ގެންދާ ކަމަށް ލިބުނު މަޢުލޫމާތާ ގުޅިގެން ދ. ހުޅުދެއްޔަށް ގޮސް ހައްޔަރުކުރި މީހާގެ ޖީބުން 5 ރަބަރު ޕެކެޓްގައި 4.3835 ގްރާމް ޑައިމޯފިން ފެނުމުން، މަސްތުވާތަކެއްޗާބެހޭ ޤާނޫނުގެ 105 ވަނަ މާއްދާގެ ދަށުން ޓްރެފިކްކުރުމުގެ ދަޢުވާ ކުރެވުނެވެ. ހައްޔަރުކުރިއިރު ތުހުމަތު ކުރެވިފައިވަނީ ބޭނުންކުރުމާއި ޕެޑްލްކުރުމަށެވެ.

ޓްރެފިކްކުރުމުގެ ތުހުމަތުގައި ވަކީލެއްގެ ޙައްޤާއި ހަނުހުރުމުގެ ޙައްޤު ދީފައިނުވާކަމަށާއި، ޗެއިން އޮފް ކަސްޓަޑީ، ފުލުހުންގެ ޤަވާޢިދު 18 (ހ)، އޮޕަރޭޝަނުގެ ހުއްދަ އަދި އަދަބާމެދު ވާހަކަދެއްކުމުގެ ފުރުޞަތު ނުދިނުމާ ބެހޭ ނުކުތާ އިސްތިއުނާފުކުރާ ފަރާތުން ހުށަހެޅިއެވެ. ދައުލަތުން ބުނީ ހައްޔަރުކުރާ މީހުންގެ މަޢުލޫމާތު ފޯމުން ޙައްޤުތައް ދީފައިވާކަން އެނގޭކަމަށާއި، އިޖުރާއަތުގެ ޤާނޫނު އައުމުގެ ކުރިން ޤާނޫނީ އިންޒާރު ދިނުމުގެ އުޞޫލެއް ނެތްކަމަށެވެ.

ހައްޔަރުކުރިއިރު ތުހުމަތުކުރެވުނު ކުށްތަކުގައި ޑައިމޯފިން ޓްރެފިކްކުރުން ނުހިމެނި، ތަޙުލީލު ރިޕޯޓު ލިބުމަށްފަހު ޓްރެފިކްކުރުމުގެ ތުހުމަތުގައި އަލުން ޤާނޫނީ އިންޒާރު ދީ ސުވާލުނުކޮށް ޓްރެފިކްކުރުމުގެ ދަޢުވާ އުފުލައި ކުށް ސާބިތުކުރުމަކީ ޤާނޫނުއަސާސީގެ 48 އާއި 53 ވަނަ މާއްދާއިން ކަށަވަރުކޮށްދޭ ޙައްޤުތަކާ ޚިލާފުކަމެއްތޯ.

ދަށުކޯޓުގެ ޙުކުމް ބާޠިލު

ޓްރެފިކްކުރުމަކީ ހައްޔަރުކުރިއިރު ތުހުމަތުކުރެވުނު ކުށެއް ނޫން ކަމުންނާއި، ތަޙުލީލު ރިޕޯޓު ލިބުމަށްފަހު އެ ކުށުގައި ޤާނޫނީ އިންޒާރު ދީ ސުވާލުކޮށް ތަޙްޤީޤެއް ހިންގިކަން ނޭނގޭތީ، ތަޙްޤީޤުނުކުރެވުނު ކުށެއްގެ މައްޗަށް ކުރި ދަޢުވާއެއް ކަމަށް ބަލައި ޙުކުމް ބާޠިލުކުރެވުނެވެ.