ޕްރޮސިކިއުޓަރ ޖެނެރަލް ވ. އިބްރާހީމް ފުއާދު

ކްރިމިނަލް ކޯޓުން، ޕޮލިސީގައި ޕްރޮޕޯސަލް ހުށަހެޅޭނެ ތިން ގޮތް އޮތްއިރު ދަޢުވާގައި އެންމެ ގޮތަކާ ޚިލާފުވިކަން ބުނެފައިވާތީ ކުށުގެ އުންޞުރުތައް ފުރިހަމަ ނުވާކަމަށާއި، ދަޢުވާކުރުމަށް ހުރަހަކަށްވާ ދިފާޢެއް ސާބިތުވާކަމަށް ބަލައި، ދަޢުވާ ކުރިއަށް ގެންދެވޭނެ ތަނެއް ނެތްކަމަށް ކަނޑައަޅައި ދަޢުވާ ފޯމު ބާޠިލުކޮށްފައިވެއެވެ.

ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) ގެ މެނޭޖިންގ ޑިރެކްޓަރުގެ މަޤާމުގައި ހުއްޓަ، ކުންފުނީގެ ޕްރޮކިއުމަންޓް ޕޮލިސީއާއި މެނުއަލާ ޚިލާފަށް ލޭންޑިންގ ކްރާފްޓެއް ގަތުމަށް ބޯޑަށް ހުށަހަޅައި، އަގުގެ 30% ދައްކާފައިވާތީ، މުއްތަހަމުގެ މައްޗަށް މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާއެއް ހޯދައިދިނުމުގެ ދަޢުވާ ޕްރޮސިކިއުޓަރ ޖެނެރަލްގެ އޮފީހުން ކޮށްފައިވެއެވެ.

ދައުލަތުން ބުނީ، ޤާނޫނާ ޚިލާފު ޝަރީޢަތުގެ ކުރީގެ ހުށަހެޅުމަކަށް ރިޢާޔަތްކޮށް ދަޢުވާ ބާޠިލުކުރުމަކީ ޖިނާއީ އިޖުރާއަތުގެ ޤާނޫނާ ޚިލާފުކަމަށާއި، ދަޢުވާގައި ހިމަނަންޖެހޭ ކަންކަން ކޯޓުން ކަނޑައެޅުމަކީ ޕްރޮސިކިއުޓަރ ޖެނެރަލްގެ ބާރު ހަނިކުރުންކަމަށެވެ. މުއްތަހަމު ބުނީ، ޕްރޮސިކިއުޓަރ ޖެނެރަލްގެ ބާރު ހަނިވެފައި ނުވާކަމަށާއި، ދަޢުވާ ކޮށްފައިވަނީ ވެމްކޯގެ ގަވާއިދުތަކަށް ނުބަލާކަމަށާއި، ދަޢުވާކުރުމުގެ މުއްދަތު ފަހަނައަޅާފައިވާކަމަށެވެ.

މަޤާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ދަޢުވާ، ދަޢުވާކުރުމަށް ހުރަހަކަށްވާ ދިފާޢެއް ސާބިތުވެއްޖެކަމަށް ބުނެ އިބްތިދާއީ މަރުޙަލާގައި ކްރިމިނަލް ކޯޓުން ބާޠިލުކުރުމަކީ ޖިނާއީ އިޖުރާއަތުގެ ޤާނޫނާ އެއްގޮތްތޯ؛ ޝަރީޢަތުގެ ކުރީގެ ހުށަހެޅުންތަކާއި އިބްތިދާއީ މަރުޙަލާގެ ތަރުތީބު ކޮބައިތޯ؛ ދަޢުވާގައި ހިމަނަންޖެހޭ ތަފުޞީލު ކޯޓުން ކަނޑައެޅުމަކީ ޕްރޮސިކިއުޓަރ ޖެނެރަލްގެ ބާރު ހަނިކުރުމެއްތޯ؛ އަދި ހައިކޯޓުން މައްސަލަ ތަޙުވީލުކުރަންވީތޯ ނުވަތަ އަލުން ހުށަހަޅަން ފުރުޞަތު ދޭންވީތޯ.

ދަށުކޯޓުގެ ނިންމުން ބާޠިލު؛ 30 ދުވަހުގެ ތެރޭ ދަޢުވާ އަލުން ހުށަހަޅައިފިނަމަ ޝަރީޢަތުގެ މަރުޙަލާއިން ފެށިގެން ކުރިއަށް ގެންދަން އަންގައިފި

ހުށަހެޅުނު ޝަރީޢަތުގެ ކުރީގެ ހުށަހެޅުންތަކަކީ ވާޤިޢާތަކާ ގުޅޭ، ޝަރީޢަތުގައި ބަލަންޖެހޭ ކަންކަން ކަމުން އިބްތިދާއީ މަރުޙަލާގައި ބަލައިގަނެވޭނެ ހުށަހެޅުންތަކެއް ނޫނެވެ؛ ލިމިޓޭޝަނުގެ ދިފާޢު ސާބިތުވެފައެއް ނުވެއެވެ؛ ދަޢުވާގެ ތަފުޞީލު ކޯޓުން ކަނޑައެޅުމަކީ ޕްރޮސިކިއުޓަރ ޖެނެރަލްގެ މުސްތަޤިއްލު ބާރު ހަނިކުރުމެވެ. މައުޟޫޢީގޮތުން މައްސަލަ ބަލާފައި ނުވާތީ، ސުޕްރީމް ކޯޓުގެ 2021/SC-A/12 ގެ އުޞޫލަށް ތަބާވެ، ދަޢުވާ އަލުން ހުށަހަޅާ ފުރުޞަތު ދެވުނެވެ. ފަނޑިޔާރު ޙުސައިން މަޒީދުގެ ރައުޔަކީ، އަލުން ދަޢުވާ ހުށަހެޅުމަކާނުލައި ކޯޓުތަކުގެ ޤާނޫނުގެ ތަޙުވީލުގެ މާއްދާގެ (ށ) ގެ ދަށުން މައްސަލަ ކްރިމިނަލް ކޯޓަށް ތަޙުވީލުކުރަންވީ ކަމަށެވެ.