މުޙައްމަދު މުރުޝިދު ވ. ޕްރޮސިކިއުޓަރ ޖެނެރަލް

ކްރިމިނަލް ކޯޓުން، ދިވެހިރާއްޖޭގައި އޮރިޔާންކާޑު އުފައްދައި ގެންގުޅުމުގެ ކުށުން ކުށްވެރިކޮށް، 1000 ރުފިޔާއިން ޖޫރިމަނާކުރި.

ބަދުއަޚްލާޤީ ޢަމަލެއްގެ ތުހުމަތެއްގެ ތަޙްޤީޤުގައި، ތުހުމަތުކުރެވޭ ފަރާތު ވަޒީފާ އަދާކުރި ތަނުން އޭނާއާ ޙަވާލުކުރި ކަބަޑުން އޮރިޔާން ވީޑިއޯ ހުރި 5 ސީޑީ ފެނި، އޭނާގެ ފޯނުތަކުންވެސް އޮރިޔާން ފޮޓޯ އާއި ވީޑިއޯ ފެނުމުން ދައުލަތުން ދަޢުވާކުރި.

އިސްތިއުނާފުކުރި ފަރާތުން ބުނީ ކަބަޑަކީ ޝެއާކުރާ ކަބަޑެއް ކަމަށް ދިފާޢީ ހެކިން ބުނި ހެކިބަސް ދައުލަތުން ނަފީ ނުކުރާ ކަމަށާއި، ތަޙްޤީޤު ފެށުނު މައްސަލައާ ގުޅޭ ފޮޓޯއެއް ފޯނުން ނުފެނޭ ކަމަށާއި، ކަބަޑަކީ އޭނާ އެކަނި ބޭނުންކުރާ ކަބަޑެއްކަން ސާބިތުނުވާ ކަމަށެވެ.

ތުހުމަތުކުރެވޭ ފަރާތު ބޭނުންކުރި ކަބަޑުން ފެނުނު ސީޑީތަކާއި އޭނާގެ ފޯނުން ފެނުނު ފޮޓޯ ވީޑިއޯގެ މައްޗަށް، ދިވެހިރާއްޖޭގައި އޮރިޔާންކާޑު އުފައްދައި ގެންގުޅުމުގެ ކުށް ސާބިތުވާވަރަށް ހެކި ލިބިފައިވޭތޯ، އަދި ތަޙްޤީޤު ފެށުނު މައްސަލައާ ތަފާތު ދަޢުވާއެއް ޕްރޮސިކިއުޓަރ ޖެނެރަލަށް އުފުލިދާނެތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަޢުވާ އުފުލުމަކީ ޕްރޮސިކިއުޓަރ ޖެނެރަލްގެ އިޚްތިޔާރެވެ. ކަބަޑު ތަޅުލާފައި ހުރިކަމާއި އޭނާގެ ތަޅުދަނޑިން ހުޅުވިކަމާއި ފޮރެންސިކް ރިޕޯޓުތައް ހެކިބަހުން ސާބިތުވާތީ، ދިފާޢީ ހެކިބަހަކީ ސާބިތުވާ ކަންކަން ނަފީކުރާ ވަރުގެ ޙުއްޖަތެއް ނޫނެވެ.