އިމްރާން އިބްރާހިމް ވ. އެޓަރނީ ޖެނެރަލްގެ އޮފީސް

ސިވިލް ކޯޓުން، ދަޢުވާ ލިބުނު ފަރާތުގެ ޣައިރު ޙާޟިރުގައި، ފައިސާ 6 މަސް ދުވަހުގެ ތެރޭގައި ކޯޓަށް ދައްކައި ޚަލާޞްކުރުމަށް ޙުކުމްކޮށްފައިވެއެވެ.

ފުލުހުންގެ ޚަރަދުގައި މަތީ ތަޢުލީމުގެ ކޯހެއް ފުރިހަމަކުރުމަށްފަހު 2 އަހަރު ޚިދުމަތްކުރުމަށް ވެފައިވާ އިޤްރާރުގެ ދަށުން ޚިދުމަތް ނުކުރެވުނު މުއްދަތަށް 148,474.38 ރުފިޔާ އިސްތިއުނާފުކުރި ފަރާތުގެ އަތުން ހޯދައިދިނުމަށް ދައުލަތުން ދަޢުވާކުރި މައްސަލައެކެވެ. އޭނާ ވަޒީފާއިން ވަކިކުރެވުމުން ޚިދުމަތް ނުކުރެވުނީއެވެ.

އިސްތިއުނާފުކުރި ފަރާތުން ބުނީ ނެޗުރަލް ޖަސްޓިސް އާއި ޑިއު ޕްރޮސެސް ނުދީ ވަޒީފާއިން ވަކިކުރުމަށްފަހު ފައިސާ ހޯދަން ދަޢުވާކުރީ ޤާނޫނުއަސާސީއާ ޚިލާފަށް ކަމަށާއި، ބަލިކަމުގެ އުޛުރު އަންގާފައިވަނިކޮށް ޣައިރު ޙާޟިރުގައި ޙުކުމްކުރީ ޚިލާފަށް ކަމަށެވެ.

ފުލުހުންގެ ޕޭލީވް ކޯހުގެ އިޤްރާރުގެ ދަށުން ޚިދުމަތް ނުކުރެވުނު މުއްދަތަށް ފައިސާ ހޯދުމުގެ ދަޢުވާގައި، ވަޒީފާއިން ވަކިކުރުމުގެ ޞައްޙަކަމާބެހޭ ޤާނޫނުއަސާސީގެ ޙައްޤުތަކުގެ ނުކުތާ އިސްތިއުނާފީ މަރުޙަލާގައި ބެލެވޭނެތޯއާއި، ބަލިކަމުގެ އުޛުރު ކޯޓަށް އެންގިނަމަވެސް ޣައިރު ޙާޟިރުގައި ދަށުކޯޓުން ޙުކުމްކުރުން ޤާނޫނާ އެއްގޮތްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

މި ދަޢުވާއަކީ އެއްބަސްވުމެއްގެ ދަށުން ފައިސާ ހޯދުމުގެ ދަޢުވާއެއް ކަމަށްވާތީ ވަކިކުރުމުގެ ޞައްޙަކަން އިސްތިއުނާފުގައި ބެލެވޭނެ ނުކުތާއެއް ނޫނެވެ. ބަލިކަމުގެ އުޛުރު ޤަވާޢިދުގެ 9 (ހ) ގައިވާ ގޮތަށް ހުށަހަޅާފައި ނުވާތީއާއި، އެޑްރެސް ބަދަލުވިކަން ކޯޓަށް ނާންގާތީ، ޣައިރު ޙާޟިރުގައި ޙުކުމްކުރީ ޤަވާޢިދުގެ 18 (ށ) އާއި 28 (ހ) ގެ ދަށުން ޤާނޫނީ ހަމައިގެ މަތިންނެވެ.