އިބްރާހީމް ތަޢުފީޤު ވ. އިލްޔާސް މުޙައްމަދު

ސިވިލް ކޯޓުން (C/2011-1502/Cv) ކަނޑައެޅީ، ލޯނުގެ ގޮތުގައި ދިން ފައިސާ ކެނޑުމަށްފަހު ބާކީ ފައިސާއަކީ އިބްރާހީމް ތަޢުފީޤު، އިލްޔާސް މުޙައްމަދަށް ދައްކަންޖެހޭ ފައިސާއެއް ކަމަށާއި، އެ ފައިސާ ބައިބަޔަށް ކޯޓަށް ދައްކައި ޚަލާޞްކުރުމަށެވެ.

ދިރާގުން ޝްރޫޤް މޯލްޑިވްސް (އެހެން މީހެއްގެ ނަމުގައި ރަޖިސްޓްރީކޮށްފައިވާ ލޯކަލް އިންވެސްޓްމަންޓެއް) އާ ހަވާލުކުރި ރޭޑިޔޯ ހަޓާއި އެންޓަނާ ބުޑު އެޅުމުގެ މަސައްކަތްތައް އިބްރާހީމް ތަޢުފީޤު، އިލްޔާސް މުޙައްމަދާ ހަވާލުކުރިއެވެ. މަސައްކަތުގެ އަގާއި، އިބްރާހީމް ތަޢުފީޤުގެ ބެލުމުގެ ދަށުގައި ގެއްލުނު ލެޕްޓޮޕެއްގެ އަގު ހޯދުމަށް އިލްޔާސް މުޙައްމަދު ދަޢުވާކުރިއެވެ.

އިސްތިއުނާފުކުރި ފަރާތުން ބުނީ، ހެކިތަކާއި ޤަރީނާއަށް ރިޢާޔަތް ނުކޮށް ޝްރޫޤް މޯލްޑިވްސްއަކީ އޭނާގެ ނަމުގައިވާ ލޯކަލް އިންވެސްޓްމަންޓެއް ކަމަށް ނިންމާ، މަސައްކަތުގެ ބޮޑުބައި ކޮށްފައިވާކަމަށް ކަނޑައަޅައި، މަސައްކަތުގެ އަގު މިސްލީ އަގުގެ އުޞޫލުން ވަޒަންކުރީ ޤާނޫނީ އަސާސެއް ނެތި ކަމަށާއި، މިއީ ފަނޑިޔާރުންގެ ޤާނޫނުގެ 5 ވަނަ މާއްދާގެ (ށ) އާ ޚިލާފު ކަމެއް ކަމަށެވެ.

އެހެން މީހެއްގެ ނަމުގައި ރަޖިސްޓްރީކޮށްފައިވާ ލޯކަލް އިންވެސްޓްމަންޓަކާ ހަވާލުކުރި މަސައްކަތްތައް ކުރުމަށް އެހެން މީހަކާ ޙަވާލުކުރި ފަރާތަކީ، އެ މަސައްކަތުގެ އަގު ދެއްކުމުގެ ޒިންމާ އުފުލަންޖެހޭ ފަރާތްތޯ؛ އަދި ދަށުކޯޓުން ހެކި ވަޒަންކޮށް މައްސަލަ ނިންމި ގޮތަކީ ޤާނޫނާ ޚިލާފު ގޮތެއްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ހެކިންގެ ހެކިބަހުން ސާބިތުވަނީ މަސައްކަތް ޙަވާލުކޮށް މުޢާމަލާތްކުރީ އިބްރާހީމް ތަޢުފީޤު ކަމާއި، ދަޢުވާގެ ޒިންމާ ފަރުދީ ޙައިޘިއްޔަތުން އުފުލާނެ ކަމަށް ދަށުކޯޓުގައި އޭނާ ބުނެފައިވާ ކަމެވެ. ލޯކަލް އިންވެސްޓްމަންޓާއި މަސައްކަތްކުރި މީހާއާ ދެމެދު އެއްބަސްވުމެއް ނެތުމުން، އިލްތިޒާމްތައް އަދާކުރަންޖެހޭނީ މަސައްކަތް ޙަވާލުކުރި ފަރާތެވެ. ހެކި ވަޒަންކުރުމަކީ ދަށުކޯޓުގެ ތަޤްދީރީ ބާރުގެ ދަށުން ކުރެވޭ ކަމެކެވެ.