2016/HC-A/117

ސިވިލް ކޯޓުން އެއްބަސްވުމުގައިވާ ގޮތުގެ މަތިން ރާއްޖެ ޗެމްބަރސްއިން މަސައްކަތްކޮށްފައިވާކަން ސާބިތުވާތީ މަރިޔަމް ޢަލީ ފައިސާ ދައްކަންޖެހޭކަމަށް ޙުކުމްކޮށް، ޤާނޫނީ ޚަރަދުގެ ބަދަލު ނަގައިނުދިނެވެ.

ސަބްލީސް އެގްރީމަންޓެއްގެ ދަށުން މަރުޙޫމަކަށް ލިބެންޖެހޭ ޙައްޤުތައް ވާރިޘުންނަށް ހޯދައިދިނުމަށް ރާއްޖެ ޗެމްބަރސްއާއި ވާރިޘުންނާ ދެމެދު ޤާނޫނީ މަސައްކަތުގެ އެއްބަސްވުމެއް ވެ، އިތުރަށް ހޯދައިދޭ ޙައްޤުގެ އިންސައްތައެއް ފީގެ ގޮތުގައި ދިނުމަށް އެއްބަސްވެފައިވިއެވެ. އެ އެއްބަސްވުމުގެ ދަށުން ވާރިޘެއްގެ ކިބައިން ފީ ހޯދުމަށް ރާއްޖެ ޗެމްބަރސްއިން ދަޢުވާކުރިއެވެ.

އިސްތިއުނާފުކުރި ފަރާތުން ބުނީ ޙައްޤުތައް ލިބުނީ ވާރިޘުންގެ އަމިއްލަ މަސައްކަތުން ކަމާއި، އެކަން ދައްކާ ހެއްކަށް ދަށުކޯޓުން ރިޢާޔަތްނުކުރި ކަމާއި، ޕާޓްނަރޝިޕްގެ ނަމުގައި ދަޢުވާ ހުށަހެޅީ ބާރެއް ނެތް ފަރާތެއް ކަމަށެވެ.

ޤާނޫނީ މަސައްކަތް ކޮށްދިނުމުގެ އެއްބަސްވުމެއްގެ ދަށުން ފީ ދައްކަންޖެހޭ މިންވަރު ކަނޑައެޅުމުގައި، ވާރިޘުންނަށް އިތުރު ޙައްޤުތައް ލިބުނީ ޤާނޫނީ މަސައްކަތް ކުރި ފަރާތުގެ މަސައްކަތުގެ ނަތީޖާއެއްގެ ގޮތުންތޯ ނުވަތަ ވާރިޘުންގެ އަމިއްލަ މަސައްކަތުގެ ނަތީޖާއެއްގެ ގޮތުންތޯ ސާބިތުކުރުމާއި، ޕާޓްނަރޝިޕެއްގެ ނަމުގައި ދަޢުވާ ހުށަހެޅުމުގެ ބާރު ޕާޓްނަރަކަށް ލިބިގެންވޭތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

އެއްބަސްވުމާއި ކުރި މަސައްކަތަށް އިސްތިއުނާފުކުރި ފަރާތުން އިންކާރުނުކުރާކަމާއި، ޙައްޤުތައް ލިބުނީ އަމިއްލަ މަސައްކަތުން ކަމަށް ސާބިތުކުރާނެ ކާފީ ހެކި ހުށަނާޅާތީ އިތުރު ޙައްޤުތައް ލިބުނީ ރާއްޖެ ޗެމްބަރސްގެ މަސައްކަތުގެ ނަތީޖާއެއްގެ ގޮތުން ކަމަށް ބަލަންޖެހޭކަމާއި، ޕާޓްނަރޝިޕްގެ ނަމުގައި މައްސަލަ ހުށަހެޅުމުގެ ބާރު ޕާޓްނަރަކަށް ލިބިގެންވާތީ ދަށުކޯޓުގެ ޙުކުމަށް ބަދަލު ގެންނަންޖެހޭ ސަބަބެއް ނެތެވެ.