އިބްރާހީމް ޢަލީމަނިކު ވ. ސްޓޭޓް ބޭންކް އޮފް އިންޑިޔާ

ސިވިލް ކޯޓުން ރެސް ޖުޑިކާޓާގެ މަބްދައަށް ރިޢާޔަތްކޮށް، ދަޢުވާއަކީ ހުށަހެޅިފައިވާ ގޮތަށް ބަލައި ކުރިއަށް ގެންދެވޭނެ ދަޢުވާއެއް ނޫންކަމަށް ޙުކުމްކުރި.

ސްޓޭޓް ބޭންކް އޮފް އިންޑިއާ އިން ދޫކުރި ލޯނުތަކުގެ ފައިސާ ދެއްކުމަށް ގެރެންޓަރެއްގެ މައްޗަށް ވެސް ޙުކުމްކުރެވި، ރަހުނުކުރި ރިސޯޓު ވިއްކާލުމުގެ ހުއްދަ ތަންފީޒީ ޤަޟިއްޔާތަކުން ބޭންކަށް ދީފައިވަނިކޮށް، ކޯޓުން ބޭރުގައި 27 ފެބުރުވަރީ 2020 ގައި ދަރަނީގެ އަދަދާ މެދު އެއްބަސްވުމެއް ވެފައިވާ ކަމަށް ބުނެ ބާކީ ދަރަނި ކަނޑައަޅައިދިނުމަށް އެދި ގެރެންޓަރު ސިވިލް ކޯޓަށް ދަޢުވާ ހުށަހެޅިއެވެ.

އިސްތިއުނާފުކުރި ފަރާތުން ބުނީ، މިއީ ވަކި އެއްބަސްވުމެއްގެ މައްޗަށް ކުރި އާ ދަޢުވާއެއް ކަމަށާއި ޤާނޫނުއަސާސީގެ 42 (ހ)، ކޮންޓްރެކްޓާބެހޭ ޤާނޫނުގެ 5 އާއި 20، ފަނޑިޔާރުންގެ ޤާނޫނުގެ 5 (ހ)، ކޯޓުތަކުގެ ޤާނޫނުގެ 3 އާއި 2012/HC-A/305 ގެ އުޞޫލުތަކާ ޚިލާފު ކަމަށެވެ. ބޭންކުން ބުނީ ހުށަހެޅުން އަނބުރާ ގެނެސްފައިވާތީ އެއްބަސްވުމެއް ނެތް ކަމަށާއި issue estoppel އާއި abuse of process ފުރިހަމަވާ ކަމަށެވެ.

ރަހުނު ވިއްކާލުމުގެ ހުއްދަ ދީފައިވާ ތަންފީޒީ ޤަޟިއްޔާތައް ކުރިއަށްދަނިކޮށް، ކޯޓުން ބޭރުގައި ދަރަނީގެ އަދަދާ މެދު އެއްބަސްވުމެއް ވެފައިވާ ކަމަށް ބުނެ ވަކި ދަޢުވާއެއް ހުށަހެޅުމުން، ރެސް ޖުޑިކާޓާގެ މަބްދައު ތަޠުބީޤުކޮށް ދަޢުވާ ކުރިއަށް ނުގެންދިއުމަށް ސިވިލް ކޯޓުން ނިންމީ ރަނގަޅަށްތޯ.

އިސްތިއުނާފު ބާޠިލް، ދަށުކޯޓުގެ ޙުކުމް ޤާއިމް

ދަޢުވާގައިވާ ކަންކަމަކީ ތަންފީޒީ ޤަޟިއްޔާގެ ތެރެއިން ބަލަންޖެހޭ ކަންކަން ކަމަށާއި، ވަކި ޤަޟިއްޔާއަކުން ބެލުމަކީ ޙުކުމް ތަންފީޒުކުރުމަށް ހުރަސްއަޅާ އިޖުރާއަތު ނަހަމަ ގޮތުގައި ބޭނުންކުރުން ކަމަށް ބަލައި، ރެސް ޖުޑިކާޓާ ތަޠުބީޤުކުރީ ރަނގަޅަށްކަމަށް ކަނޑައެޅި؛ ދަޢުވާގެ މައުޟޫޢާ ގުޅޭ ނުކުތާތައް ބަލަންޖެހޭ ހަމައެއް ނެތްކަމަށާއި، ޤާނޫނުއަސާސީގެ 42 (ހ) ގެ ޙައްޤު ދީފައިވާ ކަމަށް ކަނޑައެޅި.